Read nynorsk 2011 Filipparane 1 Bible Online

Filipparane 1 - nynorsk 2011 bible

Filipparane 1

¹[1] Paulus og Timoteus, Kristi Jesu tenarar, helsar alle dei heilage i Kristus Jesus som bur i Filippi, med tilsynsmenn og diakonar:

²Nåde vere med dykk og fred frå Gud, vår Far, og Herren Jesus Kristus!

³Eg takkar alltid min Gud når eg tenkjer på dykk.

⁴Og alltid, i alle mine bøner, bed eg for dykk alle med glede.

⁵For heilt frå første dagen og fram til no har de hatt del med meg i evangeliet.

⁶Og eg er viss på at han som tok til med si gode gjerning i dykk, skal fullføra henne — heilt til Jesu Kristi dag.

⁷[2] Med rette tenkjer eg slik om dykk alle, for eg ber dykk i hjartet. Både når eg er i lenkjer, og når eg forsvarar og stadfester evangeliet, har de alle fellesskap med meg i nåden.

⁸[3] Ja, Gud er mitt vitne, eg lengtar etter dykk alle med Kristi Jesu hjartelag.

⁹Og dette bed eg om, at kjærleiken dykkar må bli rikare og rikare på dømmekraft og innsikt,

¹⁰så de kan skjøna og avgjera kva som er viktig, og stå reine og ulastelege på Kristi dag,

¹¹fylte av rettferds frukt som veks fram ved Jesus Kristus, til lov og ære for Gud.

¹²Eg vil de skal vita, sysken, at det som har hendt meg, har tent til framgang for evangeliet.

¹³[4] For det er kjent i heile borga og mellom alle dei andre at det er for Kristi skuld eg ber lenkjer.

¹⁴[5] På grunn av desse lenkjene har dei fleste av syskena våre fått større tillit til Herren, så dei med endå større frimod enn før vågar å forkynna Ordet.

¹⁵Somme gjer det nok av misunning og stridslyst, men andre forkynner Kristus av god vilje.

¹⁶Dei gjer det av kjærleik, for dei veit eg er sett til å forsvara evangeliet.

¹⁷Men dei andre gjer det for å hevda seg sjølve. Dei har ikkje godt i sinne og trur dei kan gjera lenkjene mine tyngre å bera.

¹⁸Men kva gjer det? Kristus blir i alle tilfelle forkynt, om det er med baktankar eller i sanning, og det gleder eg meg over. Ja, eg skal få endå meir å gleda meg over!

¹⁹[6] For eg veit at dette skal bli mi redning, ved dykkar bøner og hjelpa frå Jesu Kristi Ande.

²⁰Min lengt og mitt håp er at eg ikkje skal bli til skamme på noko vis, men at Kristus, no som alltid, skal opphøgjast for auga på alle ved min kropp, anten det blir liv eller død.

²¹Å leva er for meg Kristus, og å døy er ei vinning.

²²Men om eg får vera i live, kan eg gjera eit arbeid som ber frukt, og då veit eg ikkje kva eg skal velja.

²³Eg er dregen til begge sider: Eg har denne lengten etter å bryta opp og vera saman med Kristus, for det er så mykje, mykje betre.

²⁴Men for dykkar skuld er det naudsynt at eg får leva vidare,

²⁵og fordi eg er viss på dette, veit eg at eg skal få leva, ja, bli verande hos dykk alle og hjelpa dykk til framgang og glede i trua.

²⁶Då skal de få rikeleg grunn til å vera glade og stolte i Kristus Jesus for mi skuld, når eg på nytt kjem til dykk.

²⁷Så gjeld det berre at de lever eit liv som er Kristi evangelium verdig. Om eg sjølv kjem og ser dykk, eller om eg er borte, så lat meg få høyra at de står saman i éi ånd, kjempar med eitt sinn for trua på evangeliet

²⁸og ikkje på nokon måte lèt dykk skremma av motstandarane. Dette er eit teikn frå Gud, eit teikn som varslar fortaping for dei, men frelse for dykk.

²⁹For den nåden er gjeven dykk for Kristi skuld, ikkje berre å tru på han, men òg å lida for han.

³⁰De står i same striden som de såg at eg stod i, og som de no høyrer at eg framleis står i.