Read nynorsk 2011 Kolossarane 1 Bible Online

Kolossarane 1 - nynorsk 2011 bible

Kolossarane 1

¹[1] Paulus, etter Guds vilje Kristi Jesu apostel, og vår bror Timoteus

²[2] helsar dei heilage i Kolossai, dei truande sysken i Kristus: Nåde vere med dykk og fred frå Gud, vår Far!

³Vi takkar alltid Gud, vår Herre Jesu Kristi Far, når vi bed for dykk.

⁴For vi har fått høyra om dykkar tru på Kristus Jesus og den kjærleiken de har til alle dei heilage

⁵[3] på grunn av det håpet som ventar dykk i himmelen. Det har de alt no fått høyra om gjennom det sanne ordet, evangeliet

⁶som er kome til dykk. For i heile verda ber evangeliet frukt og breier seg ut. Det har det òg gjort hos dykk, heilt frå den dagen de høyrde det og i sanning fekk læra Guds nåde å kjenna.

⁷[4] Det var slik de lærte det av Epafras, vår kjære medarbeidar, som er ein trufast Kristi tenar for dykk.

⁸Han har òg fortalt oss om den kjærleiken de har i Anden.

⁹Heilt frå den dagen vi fekk høyra om dette, har vi ikkje halde opp med å be for dykk. Og det er vår bøn at de må bli fylte med kunnskap om Guds vilje og få all den visdom og innsikt som Anden gjev,

¹⁰så de kan leva eit liv som er Herren verdig, og vera heilt og fullt til glede for han, bera frukt i all god gjerning og stadig veksa i kjennskap til Gud.

¹¹De skal styrkjast av krafta frå hans herlegdom, så de alltid er uthaldande og tolmodige. Og med glede

¹²skal de takka Far, som gjorde dykk i stand til å få del i den arven dei heilage får i lyset.

¹³For han har fria oss ut frå mørkrets makt og ført oss over i riket til Sonen, som han elskar.

¹⁴[5] I han er vi frikjøpte og har fått tilgjeving for syndene.

¹⁵ [6] Han er biletet av den usynlege Gud, den førstefødde før alt det skapte.

¹⁶ For i han vart alt skapt, i himmelen og på jorda, det synlege og det usynlege, troner og herredøme, makter og åndskrefter — ved han og til han er alt skapt.

¹⁷ [7] Han er før alt, og i han blir alt halde saman.

¹⁸ [8] Han er hovudet for kroppen, som er kyrkja. Han er opphavet, den førstefødde frå dei døde, så han i eitt og alt skal vera den fremste.

¹⁹ For i han ville Gud la heile sin fylde bu,

²⁰ og ved han ville Gud forsona alt med seg, det som er i himmelen, og det som er på jorda, då han skapte fred ved hans blod på krossen.

²¹De òg var ein gong framande og fiendar av Gud i sinn og tanke med dei vonde gjerningane dykkar.

²²Men no har han forsona dykk med seg, då Kristus leid døden i sin kropp av kjøt og blod. Heilage, uklanderlege og utan feil ville han stilla dykk fram for seg,

²³så sant de blir ståande i trua, grunnfeste og støe, og ikkje lèt dykk riva bort frå håpet i evangeliet, det som de har høyrt. Det er forkynt for alle skapningar under himmelen, og eg, Paulus, er ein tenar for det.

²⁴No gleder eg meg over det eg må lida for dykk, og det som enno manglar i Kristi lidingar, det utfyller eg med min eigen kropp; eg lid for hans kropp, som er kyrkja.

²⁵Hennar tenar har eg vorte fordi Gud gav meg oppgåva som forvaltar hos dykk: å fullføra tenesta med Guds ord,

²⁶det mysteriet som har vore løynt gjennom alle tider og for alle slekter, men som no er openberra for hans heilage.

²⁷[9] Gud ville kunngjera for dei kor rikt på herlegdom dette mysteriet er for folkeslaga: Kristus er mellom dykk, håpet om herlegdomen!

²⁸Det er han vi forkynner. Og vi rettleier og underviser alle menneske i den fulle visdom, så vi kan føra kvart menneske fram til mognad i Kristus.

²⁹For å nå dette målet arbeider og kjempar eg i hans kraft, som verkar i meg med styrke.