Read nynorsk 2011 Kolossarane 3 Bible Online

Kolossarane 3 - nynorsk 2011 bible

Kolossarane 3

¹Er de då oppreiste med Kristus, så søk det som er der oppe, der Kristus sit ved Guds høgre hand.

²Vend dykkar sinn til det som er der oppe, ikkje til det som er på jorda.

³For de er døde, og livet dykkar er løynt med Kristus i Gud.

⁴Men når Kristus, dykkar liv, openberrar seg, skal de òg openberrast i herlegdom saman med han.

⁵[18] Så lat det jordiske i dykk døy: hor, ureinskap, lidenskap, vond lyst, og trongen til alltid å eiga meir, som ikkje er anna enn avgudsdyrking.

⁶Alt dette gjer at Guds vreide kjem over dei ulydige.

⁷Mellom dei var de òg, den gongen de levde i dette.

⁸Men no må de leggja av alt dette: sinne, raseri, vondskap, spott og rått snakk.

⁹Og lyg ikkje for kvarandre! For de har kledd av dykk det gamle mennesket med dei gjerningar som høyrer det til,

¹⁰og ikledd dykk det nye mennesket, som blir fornya etter sin skapars bilete og lærer han å kjenna.

¹¹[19] Her er ikkje grekar eller jøde, omskoren eller uomskoren, barbar, skytar, slave eller fri. Nei, Kristus er alt og i alle.

¹²[20] De er Guds utvalde, heilage og elska av han. Kled dykk difor i inderleg medkjensle og ver gode, milde, audmjuke og tolmodige,

¹³så de ber over med kvarandre og tilgjev kvarandre om den eine har noko å klaga den andre for. Som Herren har tilgjeve dykk, skal de tilgje kvarandre.

¹⁴Og over alt dette: Kled dykk i kjærleik, det bandet som bind saman og gjer fullkomen.

¹⁵Lat Kristi fred rå i hjartet dykkar, for til det vart de kalla då de vart éin kropp. Og ver takksame!

¹⁶Lat Kristi ord få rikeleg rom hos dykk, så de med visdom kan undervisa og rettleia kvarandre, med salmar, hymner og åndelege songar. Syng for Gud med takk i hjarta!

¹⁷Og alt de gjer, i ord og gjerning, skal de gjera i Herren Jesu namn og ved han takka Gud, vår Far.

¹⁸[21] Kvinner, underordna dykk mennene dykkar, som det sømer seg i Herren.

¹⁹Menn, elsk konene dykkar og ver ikkje harde mot dei.

²⁰Born, ver lydige mot foreldra dykkar i alle ting, for det er til glede i Herren.

²¹Foreldre, ver ikkje så strenge mot borna dykkar at dei mistar motet.

²²Slavar, lyd dei jordiske herrane dykkar i alle ting. Ver ikkje augnetenarar som berre vil gjera menneske til lags, men lyd dei av eit ærleg hjarte, i ærefrykt for Herren.

²³Alt arbeid skal de gjera heilhjarta, for det er Herren og ikkje menneske de tener.

²⁴For de veit at de skal få arven som løn av Herren. Kristus er den herren de skal tena.

²⁵Men den som gjer urett, skal få den løn han fortener. Her er det ikkje forskjell på folk.