Read nynorsk 2011 Kolossarane 4 Bible Online

Kolossarane 4 - nynorsk 2011 bible

Kolossarane 4

¹De som er herrar, far rett og rimeleg fram mot slavane dykkar, for de veit at de òg har ein herre i himmelen.

²Ver uthaldande i bøna, vak og be og takk Gud!

³[22] Be for oss òg, at Gud må opna ei dør for Ordet, så vi kan forkynna Kristi mysterium, det eg sit bunden for.

⁴Be om at eg må få tala slik som eg skal når eg gjer det kjent.

⁵Gå fram med visdom mellom dei som står utanfor, og bruk den dyrebare tida godt.

⁶Lat alltid orda dykkar vera venlege, men godt salta, så de veit korleis de skal svara kvar einskild.

⁷Tykikos kjem til å fortelja dykk alt om korleis eg har det. Han er ein elska bror og ein trufast tenar og medarbeidar i Herren.

⁸Eg sender han til dykk for at de skal få høyra korleis det er med oss, og for at han skal trøysta hjarta dykkar.

⁹[23] Saman med han sender eg Onesimos, vår trufaste og elska bror, som er ein av dykkar eigne. Desse to kan fortelja dykk alt herifrå.

¹⁰Aristarkos, som er i fengsel saman med meg, helsar dykk; det same gjer Markus, syskenbarnet til Barnabas. Han har de fått bod om tidlegare. Om han kjem, så ta vel imot han.

¹¹Jesus, som har tilnamnet Justus, helsar òg. Desse er dei einaste omskorne som saman med meg har arbeidd for Guds rike, og dei har vore til stor trøyst for meg.

¹²Epafras, som er ein av dykkar eigne, helsar dykk. Han er ein Kristi Jesu tenar og strider alltid for dykk i bøn, så de kan bli ståande, fullmogne og fullt overtydde om heile Guds vilje.

¹³Eg gjev han det vitnemålet at han strevar og arbeider for dykk og for dei som er i Laodikea og Hierapolis.

¹⁴Den kjære Lukas, legen, helsar dykk, like eins Demas.

¹⁵[24] Hels syskena i Laodikea, og Nymfa og forsamlinga som kjem saman i hennar hus.

¹⁶[25] Når dette brevet er opplese hos dykk, skal de sørgja for at det òg blir opplese i forsamlinga i Laodikea, og at brevet frå Laodikea blir opplese hos dykk.

¹⁷Sei til Arkippos: Sjå til at du fullfører den tenesta du har fått for Herren.

¹⁸Eg, Paulus, skriv denne helsinga med mi eiga hand. Gløym ikkje lenkjene mine! Nåden vere med dykk!