Read nynorsk 2011 1. Tessalonikar 4 Bible Online

1. Tessalonikar 4 - nynorsk 2011 bible

1. Tessalonikar 4

¹Elles, sysken, bed vi dykk og legg dykk på hjartet i Herren Jesus: De har teke imot og lært av oss korleis de skal leva og vera til glede for Gud, og slik lever de alt no. Men de må gjera endå større framsteg i dette!

²For de veit kva bod vi gav dykk frå Herren Jesus.

³For dette er Guds vilje: at de skal vera heilage, så de held dykk borte frå hor.

⁴[10] Kvar og ein skal vita å vinna seg si eiga kone i heilagdom og ære,

⁵ikkje i sanseleg lyst som heidningane, som ikkje kjenner Gud.

⁶Ingen må gjera bror sin urett eller lura han i dette. Herren straffar alt slikt, som vi før har sagt og lagt dykk på hjartet.

⁷For Gud kalla oss ikkje til ureinskap, men til eit heilagt liv.

⁸Den som avviser dette, han avviser difor ikkje eit menneske, men han avviser Gud, som gjev dykk sin heilage Ande.

⁹[11] Om syskenkjærleiken treng vi ikkje skriva til dykk, for de har sjølve lært av Gud å elska kvarandre.

¹⁰Og de viser denne kjærleiken mot alle syskena våre i heile Makedonia. Men vi legg dykk på hjartet, sysken, at de må gjera endå større framsteg i dette.

¹¹De skal setja dykkar ære i å leva eit roleg liv, passa pliktene dykkar og arbeida med hendene, som vi har bode dykk,

¹²så de kan gå sømeleg fram mellom dei som er utanfor, og ikkje treng be nokon om hjelp.

¹³[12] Vi vil ikkje, sysken, at de skal vera uvitande om dei som har sovna inn, så de ikkje skal sørgja som dei andre, dei som er utan håp.

¹⁴For så sant Jesus døydde og stod opp, og det trur vi, så skal òg Gud ved Jesus føra dei som har sovna inn, saman med han.

¹⁵Dette seier vi dykk med eit ord frå Herren: Vi som enno lever og blir att her heilt til Herren kjem, skal slett ikkje koma før dei som har sovna inn.

¹⁶For når det bydande ropet lyder, når erkeengelen lyfter si røyst og Guds basun ljomar, då skal Herren sjølv stiga ned frå himmelen, og dei døde i Kristus skal først stå opp.

¹⁷Så skal vi som har vorte att og enno lever, rykkjast bort saman med dei i skyene og møta Herren i lufta. Og så skal vi alltid vera saman med Herren.

¹⁸Trøyst kvarandre og set mot i kvarandre med desse orda!