Read nynorsk 2011 1. Tessalonikar 5 Bible Online

1. Tessalonikar 5 - nynorsk 2011 bible

1. Tessalonikar 5

¹Men om timane og tidene treng vi ikkje skriva til dykk, sysken.

²For de veit godt at Herrens dag kjem som ein tjuv om natta.

³Når folk seier: «Fred og ingen fare», då kjem undergangen over dei, brått som riene over ei kvinne som skal føda, og dei kan ikkje sleppa unna.

⁴Men de, sysken, er ikkje i mørkret, så dagen skulle koma uventa på dykk som ein tjuv.

⁵For de er alle born av lyset og born av dagen; vi høyrer ikkje natta eller mørkret til.

⁶Så lat oss ikkje sova som dei andre, men vaka og vera edrue!

⁷For dei som søv, dei søv om natta, og dei som drikk seg fulle, dei drikk om natta.

⁸Men vi som høyrer dagen til, vi skal vera edrue, kledde med tru og kjærleik som brynje og med vona om frelse som hjelm.

⁹For Gud har ikkje valt oss ut til vreide, men til å vinna frelse ved vår Herre Jesus Kristus.

¹⁰Han døydde for oss så vi skal leva saman med han anten vi vaker eller søv.

¹¹Difor må de setja mot i kvarandre og oppbyggja kvarandre, som de òg gjer.

¹²Vi bed dykk, sysken, at de må verdsetja dei som slit og arbeider mellom dykk, dei som er dykkar føresette i Herren og rettleier dykk.

¹³De skal visa dei den største kjærleik og respekt på grunn av den gjerninga dei gjer. Lat freden råda mellom dykk!

¹⁴Vi legg dykk på hjartet, sysken: Tal til rette dei som ikkje held orden på livet sitt, set mot i dei motlause, ta dykk av dei veike, ver tolmodige mot alle!

¹⁵Sjå til at ingen løner vondt med vondt, men legg vinn på å gjera godt mot kvarandre, ja, mot alle!

¹⁶ Ver alltid glade!

¹⁷ Be uavlateleg!

¹⁸ Takk Gud, kva som enn møter dykk! For dette er Guds vilje med dykk i Kristus Jesus.

¹⁹Sløkk ikkje ut Anden!

²⁰ Forakt ikkje profetord,

²¹ men prøv alt og hald fast på det gode!

²² Hald dykk ifrå vondskap av alle slag!

²³Må han sjølv, fredens Gud, helga dykk heilt igjennom. Og gjev at dykkar ånd og sjel og kropp må haldast uskadde, så de kan vera ulastelege når vår Herre Jesus Kristus kjem!

²⁴Trufast er han som kallar dykk til dette. Han skal òg fullføra det.

²⁵Be for oss, sysken!

²⁶Hels alle syskena våre i trua med eit heilagt kyss!

²⁷Eg byd dykk ved Herren at dette brevet skal lesast opp for dei alle.

²⁸Vår Herre Jesu Kristi nåde vere med dykk!