Read nynorsk 2011 Josva 13 Bible Online

Josva 13 - nynorsk 2011 bible

Josva 13

¹Josva var no gammal og langt oppi åra. HERREN sa til han: «Du er no gammal og langt oppi åra, men enno er det mykje land som står att å ta.

²[21] Dette er dei landområda som står att: alle landområda til filistrane og gesjurittane,

³frå Sjihor ved Egypt til Ekrons grense i nord — dette blir rekna som kanaaneisk og høyrer til dei fem byhovdingane til filistrane i Gaza, Asjdod, Asjkalon, Gat og Ekron — dessutan landet til avittane

⁴i sør, og heile kanaanearlandet og Meara, som høyrer til sidonarane, til Afek, til grensa mot landet til amorittane;

⁵[22] vidare landet til gebalittane og heile Libanon austover frå Baal-Gad ved foten av Hermon-fjellet til Lebo-Hamat.

⁶For israelittane si skuld skal eg ta landet frå sidonarane, alle dei som bur i fjellandet frå Libanon til Misrefot-Majim. Lat Israel få landet i arv slik eg har bode deg.

⁷No skal du fordela dette landet som arv til dei ni stammane og halve stammen til Manasse.» Den andre halvparten av stammen til Manasse, saman med

⁸rubenittane og gadittane, hadde alt teke sin eigedom, det som Moses gav dei på austsida av Jordan. Dette hadde Moses, HERRENS tenar, gjeve dei:

⁹landet frå Aroer, som ligg ut mot Arnon-elva, byen midt i dalen og heile høgsletta frå Medeba til Dibon,

¹⁰og alle byane som hadde tilhøyrt amorittkongen Sihon, som styrte i Hesjbon, heilt til grensa mot ammonittane;

¹¹og så Gilead, landet til gesjurittane og maakatittane, heile Hermon-fjellet og Basan like til Salka,

¹²heile riket til Basan-kongen Og, som styrte i Asjtarot og Edre'i. Han var den siste som var att av refaittane. Moses hadde slege dei og teke landet deira.

¹³Men israelittane tok ikkje landet frå gesjurittane og maakatittane. Dei bur midt i Israel den dag i dag.

¹⁴Det var berre stammen til Levi Moses ikkje gav nokon eigedom. Gåveoffera til HERREN, Israels Gud, er deira eigedom, slik som han hadde sagt dei.

¹⁵Moses gav land til Ruben-stammen, slekt for slekt.

¹⁶Dei fekk området frå Aroer, som ligg ut mot Arnon-elva, og byen midt i dalen, heile høgsletta til Medeba,

¹⁷Hesjbon med alle byane på sletta: Dibon, Bamot-Baal, Bet-Baal-Meon,

¹⁸Jahsa, Kedemot, Mefaat,

¹⁹Kirjatajim, Sibma, Seret-Hasjahar på høgda i dalen,

²⁰Bet-Peor, Pisga-liene og Bet-Jesjimot,

²¹og alle dei andre byane på høgsletta, heile det riket som høyrde til amorittkongen Sihon, han som styrte i Hesjbon. Moses hadde slege han og midjanittfyrstane Evi, Rekem, Sur, Hur og Reba, vasallfyrstar under Sihon, som hadde sete i landet.

²²Israelittane drap òg spåmannen Bileam, son til Beor, med sverd, saman med alle dei andre.

²³Jordan var grensa for området til rubenittane. Dette var eigedomen til rubenittane, slekt for slekt, med byar og landsbyar.

²⁴Moses gav land til Gad-stammen, altså gadittane, slekt for slekt.

²⁵Dei fekk området Jaser, alle byane i Gilead og halvparten av landet til ammonittane heilt til Aroer, som ligg midt imot Rabba,

²⁶området frå Hesjbon til Ramat-Hammispe og Betonim og frå Mahanajim til Debir-distriktet,

²⁷og i dalen fekk dei Bet-Haram, Bet-Nimra, Sukkot og Safon, det som var att av riket til Sihon, kongen i Hesjbon. Jordan utgjorde grensa, frå enden av Kinneret-sjøen, aust for Jordan.

²⁸Det var landet til gadittane, slekt for slekt, med byar og landsbyar.

²⁹Moses gav land til halvparten av stammen til Manasse, halve Manasse-stammen, slekt for slekt.

³⁰Området deira strekte seg frå Mahanajim og omfatta heile Basan, heile riket som hadde tilhøyrt Og, kongen i Basan, og alle teltbyane i Ja'ir i Basan, seksti byar i alt,

³¹og halve Gilead og Asjtarot og Edre'i, kongsbyane til Og i Basan. Dette fekk etterkomarane til Makir, son til Manasse, halvparten av makirittane, slekt for slekt.

³²Dette var eigedomane Moses fordelte på slettene i Moab, på den andre sida av Jordan, aust for Jeriko.

³³Men Moses gav ingen eigedom til Levi-stammen. HERREN, Israels Gud, er deira arv, slik som han hadde sagt dei.