Read nynorsk 2011 Josva 16 Bible Online

Josva 16 - nynorsk 2011 bible

Josva 16

¹Området til Josef-stammen strekte seg frå Jordan ved Jeriko, aust for Jeriko-kjelda, gjennom ørkenen som stig opp frå Jeriko, til fjellet ved Betel.

²[23] Frå Betel gjekk grensa til Lus og vidare gjennom området til arkittane, til Atarot.

³[24] Der tok ho vestover ned til området til jafletittane, heldt fram til Nedre Bet-Horon og Geser og enda utmed havet.

⁴Slik fekk sønene til Josef, Manasse og Efraim, sine eigedomar.

⁵Dette var området til Efraim-stammen, slekt for slekt: Grensa for landområdet deira i aust låg ved Atrot-Addar fram til øvre Bet-Horon,

⁶og gjekk derifrå ut til havet. I nord gjekk grensa ved Mikmetat. Så svinga ho austover til Taanat-Sjilo og heldt fram mot aust til Janoah.

⁷Frå Janoah gjekk ho ned til Atarot og Naara og like forbi Jeriko til Jordan.

⁸Frå Tappuah gjekk grensa vestover til Kana-bekken og enda utmed havet. Dette var den delen av landet som Efraim-stammen fekk, slekt for slekt.

⁹I tillegg kom alle byane og landsbyane der omkring som vart skilde ut for dei inne på landområdet til Manasse-stammen.

¹⁰Men dei tok ikkje landet frå kanaanearane som budde i Geser. Det bur kanaanearar i Efraim den dag i dag, men dei må gjera tvangsarbeid.