Read nynorsk 2011 Josva 19 Bible Online

Josva 19 - nynorsk 2011 bible

Josva 19

¹Det andre loddet fall på Simon, på Simon-stammen, slekt for slekt. Landet dei fekk, låg inne på området til Juda-stammen.

²Desse byane vart deira: Beer-Sjeba, Sjema og Molada,

³Hasar-Sjual, Bala og Esem,

⁴Eltolad, Betul og Horma,

⁵Siklag, Bet-Hammarkabot og Hasar-Susa,

⁶Bet-Lebaot og Sjaruhen, tretten byar med landsbyar,

⁷dessutan Ajin, Rimmon, Eter og Asjan, fire byar med landsbyar,

⁸og alle landsbyane omkring desse byane, heilt til Baalat-Beer, Rama i Negev. Dette var det landet Simon-stammen fekk, slekt for slekt.

⁹Landet deira var ein del av Juda. Den delen som fall på etterkomarane av Juda, var for stor for dei. Difor fekk etterkomarane av Simon sin arv inne i deira område.

¹⁰Det tredje loddet fall på Sebulon-stammen, slekt for slekt. Landet dei fekk, nådde heilt til Sarid.

¹¹Grensa gjekk vestover opp til Marala, vidare like forbi Dabbesjet og nådde fram til elvefaret ved Jokneam.

¹²Frå Sarid svinga ho austover, mot soloppgangen, mot området til Kislot-Tabor, og gjekk til Daberat og opp til Jafia.

¹³Derifrå tok ho austover til Gittat-Hefer og Itta-Kasin, vidare til Rimmon og gjekk så bort til Hannea.

¹⁴Så svinga grensa nordover til Hannaton og nådde fram til Jiftah-El-dalen,

¹⁵vidare Kattat, Nahalal, Sjimron, Jidala og Betlehem, i alt tolv byar med landsbyar.

¹⁶Dette var eigedomen til Sebulons etterkomarar, slekt for slekt, med byar og landsbyar.

¹⁷Det fjerde loddet fall på Jissakar, på Jissakar-stammen, slekt for slekt.

¹⁸Området deira omfatta Jisreel, Hakkesulot, Sjunem,

¹⁹Hafarajim, Sjion og Anaharat,

²⁰Harabbit, Kisjon og Ebes,

²¹Remet, En-Gannim, En-Hadda og Bet-Passes.

²²Grensa gjekk fram til Tabor, Sjahasima og Bet-Sjemesj og enda ved Jordan, seksten byar med landsbyar.

²³Dette var den eigedomen Jissakar-stammen fekk, slekt for slekt, med byar og landsbyar.

²⁴Det femte loddet fall på Asjer-stammen, slekt for slekt.

²⁵Området deira omfatta Helkat, Hali, Beten, Aksjaf,

²⁶Alammelek, Amad og Misjal. Grensa i vest gjekk fram til Karmel og Sjihor-Libnat.

²⁷Der svinga ho austover til Bet-Dagon, fram til Sebulon og Jiftah-El-dalen mot nord, til Bet-Ha'emek og Ne'iel og vidare nordover til Kabul,

²⁸Ebron, Rehob, Hammon og Kana, og heilt til det store Sidon.

²⁹Ved Rama svinga grensa og gjekk vidare til festningsbyen Tyros, svinga ved Hosa og nådde fram til havet; i tillegg Mehalleb, Aksib,

³⁰Umma, Afek og Rehob, i alt tjueto byar med landsbyar.

³¹Dette var eigedomen til Asjer-stammen, slekt for slekt, med byar og landsbyar.

³²Det sjette loddet fall på Naftali, på Naftali-stammen, slekt for slekt.

³³Området deira strekte seg frå Helef, frå Elon ved Saanannim, forbi Adami-Hannekeb og Jabneel til Lakkum og heilt fram til Jordan.

³⁴Der svinga grensa mot vest til Asnot-Tabor og gjekk derifrå til Hukkok. I sør grensa landet til Sebulon, i vest til Asjer og i aust til Jordan.

³⁵Festningsbyane var Hassiddim, Ser, Hammat, Rakkat, Kinneret,

³⁶Adama, Rama og Hasor,

³⁷Kedesj, Edre'i og En-Hasor,

³⁸Jiron, Migdal-El, Horem, Bet-Anat og Bet-Sjemesj, i alt nitten byar med landsbyar.

³⁹Dette var landet Naftali-stammen fekk i eige, med byar og landsbyar.

⁴⁰[26] Det sjuande loddet fall på Dan, på Dan-stammen, slekt for slekt.

⁴¹I landet deira låg Sora, Esjtaol, Ir-Sjemesj,

⁴²Sjaalabbin, Ajjalon og Jitla,

⁴³Elon, Timna og Ekron,

⁴⁴Elteke, Gibbeton og Baalat,

⁴⁵Jehud, Bene-Berak og Gat-Rimmon,

⁴⁶Me-Hajjarkon, Harakkon og området bort imot Jaffa.

⁴⁷[27] Men området til Dans etterkomarar vart teke frå dei. Difor drog dei opp til Lesjem, gjekk til åtak på byen og tok han. Dei hogg ned innbyggjarane med sverd, la byen under seg og busette seg der. Og dei kalla Lesjem for Dan, etter Dan, stamfar sin.

⁴⁸Dette var eigedomen til Dan-stammen, slekt for slekt, med byar og landsbyar.

⁴⁹Då israelittane hadde fordelt arven, område for område, gav dei Josva, son til Nun, ein eigedom midt iblant seg.

⁵⁰Som HERREN hadde sagt, gav dei han den byen han bad om: Timnat-Serah i fjellområdet som høyrde Efraim til. Han bygde byen opp att og busette seg der.

⁵¹Dette var eigedomane som presten Elasar, Josva, son til Nun, og leiarane for familiane fordelte ved loddkasting til stammane i Israel i Sjilo, for HERRENS andlet, ved inngangen til teltheilagdomen. Så avslutta dei fordelinga av landet.