Read nynorsk 2011 Josva 21 Bible Online

Josva 21 - nynorsk 2011 bible

Josva 21

¹Leiarane for kvar familie blant levittane kom til presten Elasar, til Josva, son til Nun, og til leiarane for familiane i dei andre israelittiske stammane

²og tala til dei i Sjilo i Kanaan. Dei sa: «HERREN har gjennom Moses sagt at vi skulle få byar å bu i, med beitemarker omkring for feet vårt.»

³Då gav israelittane av sin eigedom desse byane til levittane, med beitemarker omkring, slik HERREN hadde sagt:

⁴Først fall loddet på Kehat-slektene. Ved loddkasting fekk etterkomarane blant levittane etter presten Aron tretten byar frå stammane til Juda, Simon og Benjamin.

⁵Dei andre Kehat-slektene fekk ved loddkasting ti byar frå slektene i stammane til Efraim og Dan og halvparten av stammen til Manasse.

⁶Etterkomarane av Gersjon fekk ved loddkasting tretten byar frå slektene i stammane til Jissakar, Asjer og Naftali og frå den halvparten av stammen til Manasse som budde i Basan.

⁷Etterkomarane av Merari, slekt for slekt, fekk tolv byar frå stammane til Ruben, Gad og Sebulon.

⁸Desse byane med beitemarker gav israelittane til levittane ved loddkasting, slik HERREN hadde sagt gjennom Moses.

⁹Dei byane som no skal nemnast, er byane som vart gjevne frå stammane til Juda og Simon.

¹⁰Dei vart gjevne til aronittane, som høyrde til Kehats slekt og stamma frå Levi, for loddet fall først på dei.

¹¹Dei fekk Kirjat-Arba, det er Hebron i fjellandet til Juda, med beitemarker som høyrde til. Arba var stamfar til anakittane.

¹²Men åkerjorda og landsbyane som høyrde byen til, gav dei Kaleb, son til Jefunne, som hans eigedom.

¹³[29] Etterkomarane av Aron, prestane, fekk desse byane: Hebron, fribyen for drapsmenn, med beitemarker, og Libna med beitemarker,

¹⁴Jattir og Esjtemoa med beitemarker,

¹⁵Holon og Debir med beitemarker,

¹⁶Ajin, Jutta og Bet-Sjemesj med beitemarker, i alt ni byar frå desse to stammane.

¹⁷Frå Benjamin-stammen fekk dei Gibeon og Geba med beitemarker,

¹⁸Anatot og Almon med beitemarker, i alt fire byar.

¹⁹Til saman fekk etterkomarane av Aron, prestane, tretten byar med beitemarkene som høyrde til.

²⁰Levittane frå dei andre Kehat-slektene fekk ved loddkasting byar frå Efraim-stammen.

²¹Dei fekk Sikem i fjellandet til Efraim, som var friby for drapsmenn, med beitemarker som høyrde til, og Geser med beitemarker,

²²Kibsajim og Bet-Horon med beitemarker, i alt fire byar.

²³Frå Dan-stammen fekk dei Elteke og Gibbeton med beitemarker,

²⁴Ajjalon og Gat-Rimmon med beitemarker, i alt fire byar.

²⁵Frå halvparten av stammen til Manasse fekk dei Taanak og Jibleam med beitemarker, i alt to byar.

²⁶Til saman fekk etterkomarane av Kehat ti byar med beitemarker som høyrde til.

²⁷Dei levittslektene som stamma frå Gersjon, fekk frå halvparten av stammen til Manasse Golan i Basan, som var friby for drapsmenn, og Beesjtera, to byar med beitemarker.

²⁸Frå Jissakar-stammen fekk dei Kisjon og Daberat med beitemarker,

²⁹Jarmut og En-Gannim med beitemarker, i alt fire byar.

³⁰Frå Asjer-stammen fekk dei Misjal og Abdon med beitemarker,

³¹Helkat og Rehob med beitemarker, i alt fire byar.

³²Frå Naftali-stammen fekk dei Kedesj i Galilea, som var friby for drapsmenn, og Hammat-Dor og Kartan med beitemarker, altså tre byar.

³³I alt fekk etterkomarane av Gersjon tretten byar med beitemarker omkring.

³⁴Resten av levittane, som stamma frå Merari, fekk desse byane: frå Sebulon-stammen Jokneam og Karta med beitemarker,

³⁵Dimna og Nahalal med beitemarker, i alt fire byar;

³⁶frå Ruben-stammen Beser og Jahsa med beitemarker,

³⁷Kedemot og Mefaat med beitemarker, i alt fire byar;

³⁸frå Gad-stammen Ramot i Gilead, som var friby for drapsmenn, med beitemarker, og Mahanajim med beitemarker,

³⁹Hesjbon og Jaser med beitemarker, i alt fire byar.

⁴⁰I alt fekk slektene til Merari, som utgjorde resten av levittane, tolv byar ved loddkasting.

⁴¹Alle levittbyane låg innanfor eigedomen til israelittane, i alt førtiåtte byar med beitemarker.

⁴²Kvar av desse byane hadde beitemarker som høyrde til. Slik var det med dei alle.

⁴³Slik gav HERREN Israel heile det landet som han med eid hadde lova å gje fedrane deira. Dei tok landet i eige og busette seg der.

⁴⁴HERREN lét dei finna kvile og ha fred på alle kantar, slik han hadde lova fedrane. Ingen fiende kunne stå seg mot dei, for HERREN gav alle fiendar i deira hender.

⁴⁵Alle lovnader som HERREN gav til Israels hus, vart oppfylte. Alt gjekk slik til som han hadde lova.