Read nynorsk 2011 Josva 23 Bible Online

Josva 23 - nynorsk 2011 bible

Josva 23

¹Lenge etter, då HERREN hadde late Israel finna kvile og få fred for fiendane omkring seg, på den tida Josva var gammal og langt oppi åra,

²hende det at Josva kalla heile Israel saman, dei eldste, hovdingane, dommarane og tilsynsmennene, og sa til dei: Eg er gammal og langt oppi åra.

³De har sjølve vore vitne til alt det HERREN dykkar Gud har gjort mot desse folkeslaga for dykkar skuld. For HERREN dykkar Gud har sjølv kjempa for dykk.

⁴Sjå, eg har late stammane dykkar arva landet til dei folkeslaga som er att, og landet til alle folka som eg har utrydda, frå Jordan til Storhavet, der sola går ned.

⁵HERREN dykkar Gud vil sjølv driva folkeslaga ut føre dykk og ta landet frå dei, så de kan ta landet deira i eige, slik HERREN dykkar Gud har lova dykk.

⁶Lat dykk aldri rokka! Hald alt som står skrive i lovboka til Moses, og gjer etter det. Vik ikkje, korkje til høgre eller venstre!

⁷Gjev dykk ikkje i lag med desse folka som enno er att hos dykk. Ta ikkje namnet til gudane deira på tunga! Sver ikkje ved dei, dyrk dei ikkje og bøy dykk ikkje og tilbed dei!

⁸Men hald fast ved HERREN dykkar Gud, som de har gjort til denne dag.

⁹For dykkar skuld har HERREN teke land frå store og mektige folkeslag, men mot dykk har ingen til denne dag kunna stå seg.

¹⁰Ein einaste av dykk kunne jaga tusen på flukt. For HERREN dykkar Gud stridde sjølv for dykk, som han hadde lova dykk.

¹¹Ta dykk no vel i vare, så de elskar HERREN dykkar Gud.

¹²For dersom de verkeleg skulle halda dykk til desse folkeslaga som er att hos dykk, knyta slektsband og blanda dykk med dei, og dei med dykk,

¹³då skal de kjenna at HERREN dykkar Gud ikkje lenger vil driva ut desse folkeslaga for dykkar skuld. Dei skal bli ei snare og ei felle for dykk, ein pisk over ryggen og tornar i auga, heilt til de blir utrydda frå dette gode landet som HERREN dykkar Gud har gjeve dykk.

¹⁴Sjå, eg skal gå den vegen som alt her på jorda må gå. Men de skal få røyna av heile dykkar hjarte og heile dykkar sjel at ingen av lovnadene som HERREN gav dykk, slo feil. Alt har vorte oppfylt, ikkje eit ord slo feil.

¹⁵Men liksom de har fått alt det gode HERREN dykkar Gud lova dykk, skal HERREN òg la alt det vonde han varsla, koma over dykk, heilt til han får utrydda dykk frå det gode landet som han gav dykk.

¹⁶Dersom de bryt pakta som HERREN dykkar Gud gjorde med dykk, og byrjar å dyrka andre gudar og bøyer dykk og tilbed dei, då vil HERRENS vreide loga imot dykk, og de skal snart bli utrydda frå det gode landet han har gjeve dykk.