Read nynorsk 2011 Josva 4 Bible Online

Josva 4 - nynorsk 2011 bible

Josva 4

¹Då alt folket var kome over Jordan, sa HERREN til Josva:

²«Vel dykk ut tolv menn av folket, ein frå kvar stamme,

³og byd dei: Ta opp tolv steinar frå den staden midt i Jordan der prestane står, ber dei med dykk over, og legg dei ned der de slår leir i natt.»

⁴Då kalla Josva til seg dei tolv mennene han hadde valt ut blant israelittane, ein frå kvar stamme,

⁵og sa til dei: «Gå midt ut i Jordan framfor paktkista til HERREN dykkar Gud! Ta så opp ein stein kvar og legg han på aksla, like mange steinar som det er stammar i Israel.

⁶Dette skal vera eit teikn mellom dykk. Når borna dykkar i morgon spør: Kva tyder desse steinane?

⁷skal de svara: Vatnet i Jordan vart borte framfor HERRENS paktkiste. Då kista kom ut i elva, vart vatnet i Jordan borte, og desse steinane skal israelittane for alltid ha som eit minne om dette.»

⁸Israelittane gjorde som Josva baud dei. Midt ute i Jordan tok dei tolv steinar, like mange som det er stammar i Israel, slik som HERREN hadde sagt til Josva. Dei bar dei med seg til leiren og la dei ned der.

⁹Og midt ute i Jordan, på den staden der prestane med paktkista hadde stått, reiste Josva tolv steinar. Dei står der den dag i dag.

¹⁰Prestane som bar kista, vart ståande midt ute i Jordan til alt som HERREN hadde pålagt Josva å seia folket, var gjort, slik òg Moses hadde pålagt Josva. Folket skunda seg over elva.

¹¹Då alle var komne over, gjekk prestane vidare føre folket med HERRENS paktkiste.

¹²Rubenittane og gadittane og halve stammen til Manasse gjekk fullt rusta i spissen for israelittane, slik som Moses hadde sagt dei.

¹³Om lag førti tusen mann, væpna til strid, gjekk for HERRENS andlet over elva mot slettene ved Jeriko for å slåst.

¹⁴Den dagen gjorde HERREN Josva stor i auga til israelittane, og så lenge han levde, frykta dei han slik dei hadde frykta Moses.

¹⁵ HERREN sa til Josva:

¹⁶[6] «Sei til prestane som ber kista med vitnemålet, at dei skal stiga opp frå Jordan.»

¹⁷Og Josva baud prestane: «Stig opp frå Jordan!»

¹⁸Med det same prestane som bar HERRENS paktkiste, steig opp frå Jordan og sette foten på tørt land, kom vatnet i Jordan tilbake og fløymde over breddene sine som før.

¹⁹[7] Det var den tiande dagen i den første månaden at folket steig opp frå Jordan. Dei slo leir i Gilgal, ved austgrensa for Jeriko.

²⁰Dei tolv steinane som dei hadde teke med seg frå Jordan, reiste Josva i Gilgal,

²¹og han sa til israelittane: «Når borna dykkar i morgon spør fedrane sine: Kva tyder desse steinane?

²²skal de forklara det for borna og seia: Her gjekk israelittane over Jordan på tørt land.

²³HERREN dykkar Gud tørka ut vatnet i Jordan for dykk til de hadde gått over, slik HERREN dykkar Gud gjorde med Sivsjøen, som han tørka ut for oss til vi var komne over.

²⁴Det gjorde han for at alle folk på jorda skal skjøna at HERRENS hand er sterk, og for at de alle dagar skal frykta HERREN dykkar Gud.»