Read nynorsk 2011 Josva 7 Bible Online

Josva 7 - nynorsk 2011 bible

Josva 7

¹Men israelittane var trulause og tok for seg av det bannlyste godset: Akan, son til Karmi, son til Sabdi, son til Serah frå Juda-stammen, tok av det. Då flamma HERRENS vreide opp mot israelittane.

²[12] Josva sende nokre menn frå Jeriko til Ai, som ligg ved Bet-Aven, aust for Betel. Han sa til dei at dei skulle dra opp og spionera i landet. Og mennene drog opp og spionerte i Ai.

³Då dei kom tilbake til Josva, sa dei til han: «Ikkje send heile hæren! La to eller tre tusen mann dra opp og ta Ai. Ikkje slit ut heile hæren, for det bur så få der.»

⁴Så drog om lag tre tusen mann av hæren dit. Men dei måtte rømma for folket i Ai,

⁵som drap om lag trettiseks av dei. Dei forfølgde dei frå byporten heilt til steinbrota og drap dei på vegen nedover. Då smelta hjartet til folket bort og vart som vatn.

⁶[13] Josva reiv sund kleda sine og kasta seg ned med andletet mot jorda framfor HERRENS paktkiste og vart liggjande heilt til kvelds, han og dei eldste i Israel. Dei strødde jord på hovudet.

⁷Og Josva sa: «Å, GUD, min Herre! Kvifor førte du dette folket over Jordan? Var det for å gje oss over i hendene på amorittane og utsletta oss? Gjev vi hadde vorte verande på den andre sida av Jordan!

⁸Høyr meg, Herre! Kva skal eg seia no når Israel har måtta snu ryggen til fienden og rømma?

⁹Når kanaanearane og alle dei andre som bur her i landet, får høyra om dette, kjem dei til å omringa oss og utsletta namna våre frå jorda. Kva vil du då gjera for ditt store namn?»

¹⁰Då sa HERREN til Josva: «Reis deg opp! Kvifor ligg du slik med andletet mot jorda?

¹¹Israel har synda! Dei har brote den pakta eg baud dei å halda, dei har teke av det bannlyste godset, dei har stole det og gøymt det bort innimellom sine eigne ting.

¹²Difor kan ikkje israelittane stå seg mot fiendane. Dei må snu ryggen til dei og rømma fordi dei sjølve har vorte slegne med bann. Eg vil ikkje vera med dykk dersom de ikkje øydelegg det bannlyste godset som finst hos dykk.

¹³Reis deg og gjer folket reint og heilagt! Du skal seia: Helga dykk til i morgon! For så seier HERREN, Israels Gud: Du har bannlyst gods hos deg, Israel. Du kan ikkje stå deg mot fiendane før de har kvitta dykk med det bannlyste godset.

¹⁴I morgon tidleg skal de stiga fram, stamme for stamme. Den stammen som HERREN tek ut, skal stiga fram, slekt for slekt. Den slekta som HERREN tek ut, skal stiga fram, familie for familie. Og den familien HERREN tek ut, skal stiga fram, mann for mann.

¹⁵Den som blir teken med bannlyst gods, skal brennast med eld, han og alt som høyrer han til. For han har brote HERRENS pakt og gjort ei skammeleg gjerning i Israel.»

¹⁶Neste morgon stod Josva tidleg opp og lét Israel stiga fram, stamme for stamme. Og Juda-stammen vart teken ut.

¹⁷Han lét då slektene i Juda stiga fram, og Serah-slekta vart teken ut. Så lét han Serah-slekta stiga fram, familie for familie, og Sabdis familie vart teken ut.

¹⁸Til slutt lét han Sabdis familie stiga fram, mann for mann, og Akan vart teken ut. Han var son til Karmi, son til Sabdi, son til Serah av Juda-stammen.

¹⁹Då sa Josva til Akan: «Son min, gjev HERREN, Israels Gud, ære, og takk han! Fortel meg kva du har gjort, og gøym ikkje noko for meg.»

²⁰Akan svara: «Det er sant, eg har synda mot HERREN, Israels Gud. Dette har eg gjort:

²¹Blant hærfanget såg eg ei dyr kappe frå Sjinar, to hundre sjekel sølv og ein gullbarre på femti sjekel. Eg fekk lyst på dette og tok det. No ligg det gøymt i jorda under teltet mitt; sølvet ligg underst.»

²²Då sende Josva nokre menn av stad, og dei sprang bort til teltet. Byttet var gøymt i teltet, og sølvet låg underst.

²³Dei tok det med seg frå teltet og bar det til Josva og alle israelittane og tømde det ut framfor HERRENS andlet.

²⁴[14] Josva og heile Israel tok Akan, Serahs son, saman med sølvet, kappa og gullbarren, med søner og døtrer, storfe, esel og småfe, teltet og alt han eigde, og dei førte det opp til Akor-dalen.

²⁵Og Josva sa: «For ei ulukke du har ført over oss! I dag skal HERREN føra ulukke over deg.» Og heile Israel steina han. Dei brende og steina alt og alle.

²⁶Så kasta dei opp ei stor steinrøys over han, og ho ligg der den dag i dag. Då vende HERREN om frå sin brennande vreide. Difor blir denne staden kalla Akor-dalen den dag i dag.