Read nynorsk 2011 Josva 9 Bible Online

Josva 9 - nynorsk 2011 bible

Josva 9

¹Då alle kongane som budde vestafor Jordan, i fjellandet, i låglandet og langsmed heile kysten av Storhavet opp mot Libanon, hetittane, amorittane, kanaanearane, perisittane, hevittane og jebusittane, fekk høyra kva som hadde hendt,

²slo dei seg saman for å kjempa mot Josva og israelittane, alle som ein.

³Men då innbyggjarane i Gibeon høyrde kva Josva hadde gjort med Jeriko og Ai,

⁴greip dei til list dei òg. Dei gjekk av stad for å proviantera, og på esla sine la dei utslitne kløvsekker og lappa, sprokne og utslitne vinsekker.

⁵Dei hadde utslitne og lappa skor på føtene og fillete klede på kroppen, og alt nistebrødet deira var tørt og smuldra.

⁶Så drog dei til Josva i leiren ved Gilgal og sa til han og israelittane: «Vi kjem frå eit land langt borte. Gjer no ei pakt med oss!»

⁷Israelittane sa til hevittane: «De bur kanskje her midt iblant oss. Korleis kan vi då gjera pakt med dykk?»

⁸Dei sa til Josva: «Vi er tenarane dine.» Josva spurde: «Kven er de, og kvar kjem de frå?»

⁹Hevittane svara: «Tenarane dine er komne frå eit land langt borte fordi det går ord om HERREN din Gud. Vi har høyrt det som blir sagt om han, om alt det han gjorde i Egypt,

¹⁰og alt det han gjorde med dei to amorittkongane på den andre sida av Jordan, Sihon, kongen i Hesjbon, og Basan-kongen Og, som budde i Asjtarot.

¹¹Difor sa dei eldste iblant oss og alle som bur i landet vårt: Ta med dykk niste på vegen, gå dei til møtes og sei til dei: Vi er tenarane dykkar. Gjer no ei pakt med oss!

¹²Her er brødet vårt, som var varmt då vi tok det med heimanfrå den dagen vi drog av stad for å møta dykk. Men sjå no kor tørt og smuldra det har vorte!

¹³Her er vinsekkene våre, som var nye då vi fylte dei. Men sjå, no er dei sprokne. Og her ser de kleda og skorne våre, utslitne etter den lange reisa.»

¹⁴Mennene tok og smaka på nista deira, men dei spurde ikkje HERREN til råds.

¹⁵Josva slutta fred og gjorde ei pakt med dei om at dei skulle få leva, og leiarane i forsamlinga stadfeste dette med eid.

¹⁶Tre dagar etter at israelittane hadde gjort pakt med dei, fekk dei høyra at dei var grannar og budde midt iblant dei.

¹⁷Israelittane braut då opp, og den tredje dagen kom dei til byane deira. Byane var Gibeon, Kefira, Beerot og Kirjat-Jearim.

¹⁸Men israelittane slo dei ikkje i hel, sidan leiarane i forsamlinga hadde svore ved HERREN, Israels Gud. Då klaga heile forsamlinga til leiarane.

¹⁹Men leiarane sa til forsamlinga: «Vi har svore ved HERREN, Israels Gud, så no kan vi ikkje leggja hand på dei.

²⁰Men slik gjer vi med dei: Vi lèt dei få leva, så vi ikkje blir råka av vreide på grunn av eiden vi har svore.»

²¹Leiarane sa: «Dei skal få leva.» Og dei vart vedhoggarar og vassberarar for heile forsamlinga, slik leiarane sa til dei.

²²Josva kalla mennene frå Gibeon til seg og sa til dei: «Kvifor narra de oss og sa at de bur langt borte når de bur iblant oss?

²³No skal de vera forbanna! Ingen av dykk skal sleppa å vera slavar. De skal hogga ved og bera vatn til huset til min Gud.»

²⁴Då svara dei Josva: «Det hadde vorte kunngjort klårt og tydeleg for tenarane dine at HERREN din Gud hadde gjeve tenaren sin Moses påbod om å gje dykk heile landet, og for dykkar skuld rydda ut alle som bur der. Då vart vi redde for at de skulle drepa oss. Difor gjorde vi som vi gjorde.

²⁵Men no er vi i di hand. Gjer med oss som du finn rett i dine auge.»

²⁶Josva gjorde då slik at han redda dei frå israelittane, så dei ikkje vart drepne.

²⁷Og same dagen sette Josva dei til å hogga ved og bera vatn til forsamlinga og til HERRENS altar, og det gjer dei den dag i dag på den staden som HERREN har valt ut.