Read nynorsk 2011 2. Tessalonikar 2 Bible Online

2. Tessalonikar 2 - nynorsk 2011 bible

2. Tessalonikar 2

¹Når det gjeld vår Herre Jesu Kristi kome, og det at vi skal samlast hos han, bed vi dykk, sysken:

²[4] Lat dykk ikkje så lett driva ut i forvirring, og lat dykk ikkje skremma, verken av åndsbodskapar, av påstandar eller av brev som dei seier er frå oss, om at Herrens dag er komen.

³[5] Lat ingen føra dykk vill på nokon måte! For først må fråfallet koma og den lovlause syna seg, han som er fortapingssonen.

⁴Det er motstandaren, han som opphøgjer seg over alt det som gud og heilagdom heiter, så han til og med set seg i Guds tempel og gjer seg sjølv til gud.

⁵Hugsar de ikkje at eg sa dette då eg var hos dykk?

⁶Og de veit kva som no held han att, så han først openberrar seg når hans tid kjem.

⁷Lovløysa er alt verksam med si kraft, men i løyndom, for han som enno held att, må først ryddast av vegen.

⁸[6] Då skal den lovlause syna seg, han som Herren Jesus skal drepa med pusten frå sin munn og gjera til inkjes den dagen han kjem i herlegdom.

⁹Når den lovlause kjem, har han si kraft frå Satan, og han står fram med stor makt og med under og falske teikn.

¹⁰Med allslags urett forfører han dei som går fortapt, fordi dei ikkje ville elska sanninga så dei kunne bli frelste.

¹¹Difor sender Gud over dei ei villfaring som gjer at dei trur løgna.

¹²Og slik får dei sin dom, alle dei som ikkje trudde sanninga, men hadde si glede i uretten.

¹³[7] Vi må alltid takka Gud for dykk, sysken, de som er elska av Herren. For som førstegrøde valde Gud dykk ut til å bli frelste, de som vart helga av Anden og trudde sanninga.

¹⁴Dette kalla han dykk til ved det evangeliet vi forkynner, så de skal vinna vår Herre Jesu Kristi herlegdom.

¹⁵[8] Stå då støtt, sysken, og hald fast på dei overleveringane de har vorte underviste i av oss, anten munnleg eller i brev.

¹⁶Vår Herre Jesus Kristus sjølv og Gud, vår Far, som har elska oss og i sin nåde gjeve oss ei evig trøyst og eit rikt håp,

¹⁷måtte han gje dykkar hjarte mot og styrkje dykk til alt godt, i ord og gjerning!