Read nynorsk 2011 2. Tessalonikar 3 Bible Online

2. Tessalonikar 3 - nynorsk 2011 bible

2. Tessalonikar 3

¹Til slutt, sysken, be for oss at Herrens ord må få fritt løp og haldast i ære, liksom hos dykk!

²Og be om at vi må bli berga frå vrange og vonde menneske — for det er ikkje alle som trur.

³Men Herren er trufast, han skal styrkja dykk og vara dykk frå det vonde.

⁴Og i Herren har vi den tillit til dykk at de gjer og kjem til å gjera det vi byd dykk.

⁵Gjev Herren må leia hjartet dykkar fram til Guds kjærleik og Kristi tolmod!

⁶[9] Vi byd dykk, sysken, i Herren Jesu Kristi namn, at de held dykk unna alle sysken som ikkje held orden på livet sitt og ikkje retter seg etter den overleveringa de fekk av oss.

⁷De veit sjølve korleis de må leva om de vil likna oss. For vi levde ikkje eit latmannsliv hos dykk,

⁸og vi åt ikkje vårt brød hos nokon utan å betala. Vi arbeidde natt og dag; vi streva og sleit så vi ikkje skulle vera ei bør for nokon av dykk.

⁹Vi har nok full rett til livsopphald, men vi ville gje dykk eit føredøme så de kunne etterlikna oss.

¹⁰For då vi var hos dykk, gav vi dykk dette påbodet: Den som ikkje vil arbeida, skal heller ikkje eta.

¹¹Men no høyrer vi at somme av dykk ikkje held orden på livet sitt; dei passar ikkje arbeidet sitt, dei berre går og driv.

¹²Slike folk byd og formanar vi i Herren Jesu Kristi namn at dei skal arbeida i det stille og eta sitt eige brød.

¹³Men de, sysken, bli ikkje trøytte av å gjera det som rett og godt er!

¹⁴Og er det nokon som ikkje vil retta seg etter det vi har sagt i dette brevet, skal de merka dykk kven det er. Ha ikkje noko med han å gjera, så han ser si skam.

¹⁵Men hald han ikkje for ein fiende; tal han til rette som ein bror.

¹⁶Må fredens Herre sjølv gje dykk fred, alltid og på alle måtar. Herren vere med dykk alle!

¹⁷[10] Eg, Paulus, skriv denne helsinga med mi eiga hand. Dette er kjennemerket i kvart brev. Slik er mi handskrift.

¹⁸Vår Herre Jesu Kristi nåde vere med dykk alle!