Read nynorsk 2011 1. Timoteus 3 Bible Online

1. Timoteus 3 - nynorsk 2011 bible

1. Timoteus 3

¹Dette er eit truverdig ord. Om nokon gjerne vil ha ei tilsynsteneste, er det ei verdfull oppgåve han ønskjer seg.

²[11] Difor må ein tilsynsmann ikkje kunna skuldast for noko. Han må vera mann til éi kvinne, edrueleg, forstandig, høfleg, gjestfri, god til å undervisa,

³ikkje drikkfeldig eller hardhendt, men mild, ikkje stridslysten eller glad i pengar.

⁴Han skal styra sitt eige hus godt, så borna hans alltid viser lydnad og respekt.

⁵For greier han ikkje styra sitt eige hus, korleis kan han då ha omsorg for Guds forsamling?

⁶Han må ikkje vera nyomvend, for då kunne han bli hovmodig og falla under same dommen som djevelen.

⁷Han må òg ha godt ord på seg mellom dei som står utanfor, så han ikkje blir spotta og går i djevelens snare.

⁸På same måten skal diakonane vera respekterte, ikkje tala med to tunger, ikkje drikka for mykje vin og ikkje vera ute etter skammeleg vinning.

⁹Dei skal eiga mysteriet i trua i eit reint samvit.

¹⁰Men dei òg skal prøvast først, og dersom det ikkje er noko å seia på dei, kan dei setjast til tenesta.

¹¹På same måten skal kvinnene vera ærbare, ikkje fara med sladder, men vera edruelege og pålitelege i alt.

¹²Ein diakon skal vera mann til éi kvinne, og han skal styra både born og hus på ein god måte.

¹³For dei som gjer tenesta si på ein god måte, vinn seg ei akta stilling og får stort frimod i trua på Kristus Jesus.

¹⁴Dette skriv eg til deg endå eg håpar å koma til deg om ikkje så lenge.

¹⁵Men skulle det dryga, vil eg du skal vita korleis ein skal ferdast i Guds hus, som er den levande Guds forsamling, søyle og grunnvoll for sanninga.

¹⁶Og samstemt vedkjenner vi at mysteriet i vår gudstru er stort. Han vart openberra i kjøt og blod, rettferdiggjord i Anden, sedd av englar, forkynt mellom folkeslag, trudd i verda, oppteken i herlegdom.