Read nynorsk 2011 2. Timoteus 3 Bible Online

2. Timoteus 3 - nynorsk 2011 bible

2. Timoteus 3

¹Du skal vita at i dei siste dagane skal det koma tunge tider.

²[9] Då skal folk vera sjølvopptekne og pengegriske, skrytande, hovmodige, spottande, ulydige mot foreldre, utakksame og utan tanke for det heilage,

³ukjærlege og uforsonlege, baktalande og utan herredøme over seg sjølve, råe, utan kjærleik til det gode,

⁴svikefulle, oppfarande og store i eigne auge. Dei elskar lystene sine meir enn dei elskar Gud.

⁵Dei er gudfryktige utanpå, men fornektar krafta i gudsfrykta. Vend deg bort frå slike folk!

⁶Mellom dei er det nokre som lurer seg inn i heimane og får makt over svake kvinner som er tyngde av synder, slike kvinner som lèt seg driva av mange slag lyster,

⁷og som alltid får undervising, men aldri kan læra sanninga å kjenna.

⁸[10] Slik Jannes og Jambres sette seg opp mot Moses, set desse menneska seg opp mot sanninga. Dømmekrafta deira er øydelagd, og trua deira held ikkje mål.

⁹Men no skal dei ikkje ha meir framgang. For det skal bli klårt for alle kor vitlause dei er. Slik gjekk det òg med Jannes og Jambres.

¹⁰Men du har følgt meg i lære og liv, i forsett, i tru, i tolmod, kjærleik og vilje til å halda ut,

¹¹og gjennom forfølging og liding, som det eg vart utsett for i Antiokia, Ikonium og Lystra. Ja, kva har eg ikkje måtta tola av forfølgingar! Men Herren har fria meg ut av dei alle.

¹²Alle som vil leva eit gudfryktig liv i Kristus Jesus, skal bli forfølgde.

¹³Men vonde menneske og svindlarar går frå vondt til verre; dei fører vill og blir sjølve førte vill.

¹⁴Men hald du fast på det du har lært og er overtydd om; du veit kven du har lært det av.

¹⁵Og heilt frå du var eit lite barn, har du kjent dei heilage skriftene, som kan gje deg visdom til frelse ved trua på Kristus Jesus.

¹⁶[11] Kvar bok i Skrifta er innanda av Gud og til nytte i opplæring, formaning, rettleiing og oppseding i rettferd,

¹⁷så det mennesket som høyrer Gud til, kan bli fullt utrusta til all god gjerning.