Read nynorsk 2011 2. Timoteus 4 Bible Online

2. Timoteus 4 - nynorsk 2011 bible

2. Timoteus 4

¹Så sant som han kjem og opprettar sitt rike, byd eg deg framfor Guds og Kristi Jesu andlet, han som skal dømma levande og døde:

²Forkynn Ordet, stå klar i tide og utide, vis til rette, tal til tukt og tal til trøyst, og gjer alt med tolmodig undervising!

³For det skal koma ei tid då folk ikkje toler den sunne læra, men etter eige hovud tek seg lærarar i hopetal, for dei vil ha det som kilar i øyret.

⁴Dei skal venda øyret frå sanninga og halda seg til mytar.

⁵Men du skal vera edru i alt det du gjer! Ber lidingane, gjer evangelistens gjerning og fullfør di teneste!

⁶For eg blir no ofra, og tida er komen då eg skal fara herifrå.

⁷Eg har stridd den gode striden, fullført løpet og halde fast på trua.

⁸No ligg rettferdskransen ferdig for meg, den som Herren, den rettferdige dommaren, skal gje meg på den store dagen, og ikkje berre meg, men alle som har lengta med kjærleik etter at han skal koma.

⁹Skund deg og kom til meg så fort du kan.

¹⁰For Demas gjekk frå meg fordi han fekk denne verda kjær. Han har reist til Tessalonika. Kreskens har reist til Galatia, Titus til Dalmatia.

¹¹Berre Lukas er hos meg. Ta med deg Markus når du kjem; han er til stor hjelp for meg i tenesta.

¹²Tykikos har eg sendt til Efesos.

¹³Når du kjem, så ta med deg den kappa eg lét vera att i Troas hos Karpos, og bøkene, framfor alt pergamentrullane.

¹⁴Koparsmeden Aleksander har gjort meg mykje vondt. Herren skal gje han att etter hans gjerningar.

¹⁵Pass deg for han, du òg, for han har gått hardt imot forkynninga vår.

¹⁶Første gongen eg forsvara meg i retten, var det ingen som stod fram og hjelpte meg. Alle forlét meg. Gjev det ikkje må bli tilrekna dei!

¹⁷Men Herren var med meg og styrkte meg, så forkynninga skulle fullførast og alle folkeslag få høyra — og eg vart berga ut or løvegapet.

¹⁸Ja, Herren skal berga meg frå alt vondt og frelsa meg inn i sitt himmelske rike. Han vere ære i all æve! Amen.

¹⁹Hels Priska og Akvilas og alle i heimen til Onesiforos.

²⁰Erastos vart att i Korint, og Trofimos lét eg vera att i Miletos, for han var sjuk.

²¹Skund deg og kom før vinteren! Eubulos, Pudens, Linus, Klaudia og alle syskena sender si helsing.

²²Herren vere med di ånd! Nåden vere med dykk!