Read nynorsk 2011 Titus 2 Bible Online

Titus 2 - nynorsk 2011 bible

Titus 2

¹[10] Men du skal forkynna i samsvar med den sunne læra

²at eldre menn skal vera edruelege, fara verdig og forstandig fram og vera sunne i både trua, kjærleiken og tolmodet.

³Like eins at eldre kvinner skal leva som det sømer seg for heilage: at dei ikkje skal fara med sladder eller vera avhengige av mykje vin, men vera rettleiarar i det gode,

⁴så dei kan læra dei unge kvinnene å elska mann og born,

⁵leva sømeleg og reint, ta ansvar for heimen og underordna seg mennene sine, så Guds ord ikkje skal bli spotta.

⁶På same måten skal du formana dei unge mennene til å vera stødige

⁷i all si ferd. Ver sjølv eit førebilete i gode gjerningar! Lat undervisinga di vera uforfalska og boren fram med alvor,

⁸og lat forkynninga di vera sunn og ulasteleg, så kvar motstandar må skjemmast fordi han ikkje har noko vondt å seia om oss.

⁹Slavane skal du formana til å underordna seg herrane sine i alt og retta seg etter dei utan å seia imot.

¹⁰Dei må ikkje stikka noko til sides, men alltid vera ærlege og trufaste, så dei i eitt og alt kan vera til pryd for Guds, vår frelsars lære.

¹¹For Guds nåde er openberra til frelse for alle menneske.

¹²Og hans nåde oppdreg oss til å seia nei til alt ugudeleg og til verdslege lyster og leva i sjølvtukt, rettferd og gudsfrykt i den verda som no er,

¹³medan vi ventar på vårt sæle håp: at vår store Gud og frelsar Kristus Jesus skal koma i herlegdom.

¹⁴[11] For Kristus gav seg sjølv for oss. Han ville løysa oss ut frå all urettferd og reinsa oss, så vi kan vera hans eige folk, som med iver gjer gode gjerningar.

¹⁵Dette skal du forkynna, og med kraft skal du formana og visa til rette. Lat ingen sjå ned på deg!