Read nynorsk 2011 Titus 3 Bible Online

Titus 3 - nynorsk 2011 bible

Titus 3

¹Minn dei om at dei skal underordna seg styresmaktene, retta seg etter dei og vera villige til å gjera alt som er godt.

²Dei må ikkje tala stygt om andre eller skapa strid, men vera milde og tolsame mot alle menneske.

³For vi var òg ein gong uvituge og ulydige, vi fór vill og var slavar under mange slag lyster og ønske. Vi levde i vondskap og misunning, vi vart hata, og vi hata kvarandre.

⁴ Men det vart openberra kor god vår Gud og frelsar er, og kor han elskar menneska:

⁵ [12] Han frelste oss, ikkje fordi vi hadde gjort rettferdige gjerningar, men fordi han er miskunnsam. Han frelste oss ved badet som gjenføder og fornyar ved Den heilage ande,

⁶ som han så rikeleg har aust ut over oss ved Jesus Kristus, vår frelsar,

⁷ så vi skulle bli rettferdige ved hans nåde og bli arvingar til det evige livet, som er vår von.

⁸Dette er eit truverdig ord, og eg vil at du skal prenta inn det eg har sagt, så dei som er komne til tru på Gud, skal vera opptekne av å gjera gode gjerningar. Alt dette er godt og nyttig for menneska.

⁹Men tåpelege stridsspørsmål, ættetavler og strid og krangel om spørsmål i lova skal du snu ryggen til; slikt er unyttig og meiningslaust.

¹⁰Ein vranglærar skal du tala til rette både ein gong og to gonger, og så visa han frå deg.

¹¹For du veit at eit slikt menneske er på avvegar. Han syndar og har dømt seg sjølv.

¹²[13] Når eg sender Artemas eller Tykikos til deg, må du skunda deg og koma til meg i Nikopolis. Der har eg tenkt å vera vinteren over.

¹³Sjå til at Zenas, den lovlærde, og Apollos blir utrusta til reisa, så dei ikkje manglar noko.

¹⁴Også våre folk må læra å gjera gode gjerningar og hjelpa når det trengst, så livet deira ikkje skal vera utan frukt.

¹⁵Alle som er hos meg, helsar deg. Hels alle som i trua elskar oss. Nåden vere med dykk alle!