Read nynorsk 2011 Hebrearane 5 Bible Online

Hebrearane 5 - nynorsk 2011 bible

Hebrearane 5

¹Ein øvsteprest blir alltid vald ut blant menneske og innsett til å gjera teneste for menneske framfor Gud. Han skal bera fram gåver og offer for synder.

²Han kan vera mild mot dei som uvitande fer vill, fordi han òg er veik

³og difor må bera fram syndoffer for seg sjølv og ikkje berre for folket.

⁴[8] Ingen tek seg sjølv den æra, men han blir kalla av Gud, slik som Aron.

⁵Så har heller ikkje Kristus teke seg den æra å vera øvsteprest. Han fekk henne av Gud, som sa til han: Du er Son min, eg har fødd deg i dag.

⁶[9] Og som han seier ein annan stad: Du skal til evig tid vera prest av same slag som Melkisedek.

⁷Då Jesus levde som menneske, bar han fram bøner og naudrop, med høge skrik og tårer, til han som kunne berga han frå døden, og han vart bønhøyrd fordi han var gudfryktig.

⁸Endå han var Son, lærte han lydnad ved å lida.

⁹Då han hadde nådd fullendinga, vart han ei kjelde til evig frelse for alle som lyder han,

¹⁰han som av Gud vart kalla øvsteprest av same slag som Melkisedek.

¹¹Om dette har vi mykje å seia, men det er vanskeleg å forklara sidan de har vorte så likesæle med å høyra.

¹²Etter så lang tid burde de sjølve vore lærarar, men de treng nokon som på nytt lærer dykk det første og grunnleggjande i Guds ord. De har vorte slike som treng mjølk, ikkje fast føde.

¹³For den som lever av mjølk, er eit spedbarn og skjønar seg ikkje på bodskapen om rettferd.

¹⁴Men fast føde er for dei fullvaksne, dei som ved å bruka sansane har øvd dei opp til å skilja mellom godt og vondt.