Read nynorsk 2011 Hebrearane 7 Bible Online

Hebrearane 7 - nynorsk 2011 bible

Hebrearane 7

¹Denne Melkisedek var konge i Salem og prest for Gud, Den høgste. Han kom og møtte Abraham og velsigna han då Abraham kom att etter sigeren over kongane,

²[11]og Abraham gav han tiend av alt. Han er for det første Melkisedek, namnet tyder «rettferds konge», dernest er han konge i Salem, det vil seia fredens konge.

³Han er utan far og utan mor og har inga ættetavle. Dagane hans har inga byrjing og livet hans ingen ende. Slik er han lik Guds Son; han er og blir prest for alltid.

⁴[12] Legg merke til kor stor han er, denne mannen som Abraham, patriarken, gav tiend av det beste krigsbyttet.

⁵[13] Dei av Levis søner som blir prestar, skal etter lova ta tiend av folket, det vil seia av sine eigne sysken, sjølv om dei stammar frå Abraham.

⁶Men Melkisedek, som ikkje er av deira ætt, tok tiend av Abraham og velsigna han som hadde fått Guds lovnader.

⁷No kan ingen nekta for at det er den mindre som blir velsigna av den større.

⁸Elles er det dødelege menneske som tek tiend, men her er det ein som får det vitnemålet at han lever.

⁹Ja, i og med Abraham har Levi, han som elles tek tiend, på sett og vis sjølv gjeve tiend.

¹⁰For enno ufødd var han i sin stamfar då Melkisedek gjekk til møtes med han.

¹¹Dersom ein kunne nå det fullkomne gjennom det levittiske prestedømet, som folket var bunde til ved lova, kvifor måtte det då koma ein prest av eit anna slag, ein som blir kalla prest av same slag som Melkisedek og ikkje som Aron?

¹²Men når prestedømet blir endra, er det nødvendig at lova òg blir endra.

¹³For han som det her er tale om, høyrde til ein annan stamme, og ingen frå den stammen har gjort teneste ved altaret.

¹⁴Det er velkjent at vår Herre stammar frå Juda, og Moses har aldri sagt noko om prestar frå den stammen.

¹⁵Alt dette blir endå klårare når det stig fram ein annan prest, ein som er lik Melkisedek.

¹⁶Han har ikkje vorte prest gjennom ei lov som krev ei bestemt avstamming, men gjennom krafta i eit uforgjengeleg liv.

¹⁷Han får då dette vitnemålet: Du skal til evig tid vera prest av same slag som Melkisedek.

¹⁸Med dette har eit eldre bod slutta å gjelda fordi det var veikt og utan verdi.

¹⁹For lova førte ikkje noko fram til fullending. Men no kjem noko betre, ei von som gjer at vi kan koma Gud nær.

²⁰Dette har ikkje hendt utan at eid vart gjeven. Dei andre vart prestar utan eid,

²¹men denne vart innsett med eid av Gud, som seier: Herren har svore og angrar det ikkje: Du skal til evig tid vera prest.

²²Difor er ho òg så mykje betre, den pakta Jesus går god for.

²³Dessutan har det vore fleire slike prestar, for døden hindra dei i å halda fram.

²⁴Men Jesus har eit prestedøme som ikkje tek ende, fordi han er og blir til evig tid.

²⁵Difor kan han òg fullt og heilt frelsa dei som kjem til Gud ved han, sidan han alltid lever og går i forbøn for dei.

²⁶Ja, ein slik øvsteprest var det vi trong: heilag, utan vondskap, rein, skild frå syndarar og opphøgd over himlane.

²⁷Han treng ikkje, som andre øvsteprestar, bera fram offer kvar dag, først for sine eigne synder og så for syndene til folket. For offeret bar han fram éin gong for alle då han ofra seg sjølv.

²⁸Dei som lova set inn som øvsteprestar, er veike menneske. Men gjennom ordet som vart stadfest med eid, og som kom seinare enn lova, blir Sonen innsett, han som for evig har nådd fram til fullendinga.