Read nynorsk 2011 Jakob 1 Bible Online

Jakob 1 - nynorsk 2011 bible

Jakob 1

¹[1] Jakob, Guds og Herren Jesu Kristi tenar, sender si helsing til dei tolv stammane som er spreidde omkring i framande land.

²[2] Hald det berre for ei glede, sysken, når de møter alle slags prøvingar;

³for de veit at når trua blir prøvd, lærer de tolmod.

⁴Men tolmodet må visa seg i fullkomen gjerning, så de kan vera fullkomne og heile, utan nokon mangel.

⁵Men om nokon av dykk manglar visdom, skal han be til Gud, som villig og utan å klandra gjev til alle, og han skal få.

⁶Men han må be i tru, utan å tvila. For den som tvilar, liknar ei bølgje på havet som blir driven omkring og kasta hit og dit av vinden.

⁷Ikkje må eit slikt menneske venta å få noko av Herren,

⁸tvihuga som det er og ustøtt i all si ferd.

⁹Ein bror som står lågt i rang, skal vera stolt av kor høgt han blir sett,

¹⁰og ein rikmann skal vera stolt av kor lågt han blir sett, for som blomen i graset skal han forgå.

¹¹Sola stig og brenn, graset visnar, blomen fell av, og all hans prakt er borte. På same måten skal den rike visna midt i alt sitt strev.

¹²Sælt er det mennesket som held ut i freistingar. Når det har stått si prøve, skal det få livsens sigerskrans, som Gud har lova dei som elskar han.

¹³Ingen som blir freista, må seia: «Det er Gud som freistar meg.» For Gud blir ikkje freista av det vonde, og sjølv freistar han ingen.

¹⁴Alle blir freista av si eiga vonde lyst, som lokkar og dreg.

¹⁵Sidan, når lysta er svanger, føder ho synd, og når synda er mogen, føder ho død.

¹⁶Far ikkje vill, mine kjære sysken!

¹⁷[3] All god gåve og all fullkomen gåve kjem ovanfrå, frå han som er Far til lysa på himmelen. Hos han er det ikkje forandring eller skiftande skuggar.

¹⁸[4] Av sin eigen vilje har han fødd oss ved det sanne ordet, så vi skal vera ei førstegrøde av hans skapningar.

¹⁹Dette må de vita, mine kjære sysken: Kvar og ein skal vera snar til å høyra, men sein til å tala og sein til å bli sint.

²⁰For sinne hos eit menneske fører ikkje til det som er rett for Gud.

²¹Legg difor av alt som er ureint, og all slags vondskap, og ta audmjukt imot det ordet som er planta i dykk, det som har kraft til å frelsa sjelene dykkar.

²²De må gjera det Ordet seier, ikkje berre høyra det. Elles lurer de dykk sjølve.

²³For den som høyrer Ordet og ikkje gjer det Ordet seier, er lik ein mann som ser på sitt eige andlet i ein spegel:

²⁴Han ser på det, går sin veg og gløymer straks korleis han såg ut.

²⁵Men den som ser inn i fridomens fullkomne lov og held fram med det, gløymer ikkje det han høyrer, men gjer etter det. Eit slikt menneske skal vera lukkeleg i si gjerning.

²⁶Den som meiner at han dyrkar Gud, men ikkje kan tøyma tunga si, narrar seg sjølv, og gudsdyrkinga hans er utan verdi.

²⁷Ei rein og feilfri gudsdyrking for Gud, vår Far, er dette: å sjå til enkjer og foreldrelause born i deira naud, og ikkje la seg flekka til av verda.