Read nynorsk 2011 Jakob 2 Bible Online

Jakob 2 - nynorsk 2011 bible

Jakob 2

¹Mine sysken, de kan ikkje tru på vår Herre Jesus Kristus, herlegdomens Herre, og samtidig gjera forskjell på folk.

²[5] Set at det kjem to menn inn i forsamlinga dykkar — den eine i staselege klede og med gullring på fingeren, den andre fattig og i skitne klede.

³Då legg de merke til han i dei staselege kleda og seier: «Kom hit og finn deg ein god plass!» Men til den fattige seier de: «Du kan stå der!» eller: «Set deg her ved føtene mine!»

⁴Har de ikkje då skapt eit skilje mellom dykk? Har de ikkje vorte dommarar med vonde tankar?

⁵Høyr no, mine kjære sysken: Har ikkje Gud valt ut dei fattige i verda til å vera rike i trua og til å arva det riket han har lova dei som elskar han?

⁶Men de har forakta den fattige! Er det ikkje dei rike som undertrykkjer dykk og dreg dykk fram for domstolen?

⁷Er det ikkje dei som spottar det gode namnet som er nemnt over dykk?

⁸Dersom de oppfyller den kongelege lov i Skrifta: Du skal elska nesten din som deg sjølv, då gjer de rett.

⁹Men gjer de forskjell på folk, då syndar de, og lova klagar dykk som lovbrytarar.

¹⁰For den som held heile lova, men snublar i eit einaste bod, han har gjort seg skuldig i brot på dei alle.

¹¹For han som sa: Du skal ikkje bryta ekteskapet, han sa òg: Du skal ikkje slå i hel. Om du då ikkje bryt ekteskapet, men slår i hel, så har du vorte ein lovbrytar.

¹²Etter fridomens lov skal de dømmast, etter den skal de tala og handla.

¹³For dommen skal vera utan miskunn mot den som ikkje har vist miskunn. Men miskunn sigrar over dommen.

¹⁴Kva hjelper det, sysken, om nokon seier at han har tru, når han ikkje har gjerningar? Kan vel trua frelsa han?

¹⁵Set at ein bror eller ei syster ikkje har klede og manglar mat for dagen,

¹⁶kva hjelper det då om ein av dykk seier til dei: «Gå med fred, varm dykk og et dykk mette!» utan å gje dei det kroppen treng?

¹⁷På same måten er det med trua: i seg sjølv, utan gjerningar, er ho død.

¹⁸Kanskje vil nokon seia: «Du har tru, eg har gjerningar.» Vis meg di tru utan gjerningar, så skal eg ut frå gjerningane visa deg mi tru.

¹⁹Du trur at Gud er éin? Det gjer du rett i. Dei vonde åndene trur det same — og skjelv!

²⁰Vil du ikkje skjøna, du tankelause menneske, at tru utan gjerningar er til inga nytte?

²¹Var det ikkje på grunn av gjerningar at Abraham, far vår, vart rekna som rettferdig då han bar fram Isak, son sin, som offer på altaret?

²²Slik kan du sjå at trua verka saman med gjerningane hans, og gjennom gjerningane vart trua fullenda.

²³På den måten vart dette skriftordet oppfylt: Abraham trudde Gud, og difor rekna Gud han som rettferdig, og han vart kalla «Guds ven».

²⁴Der ser de at eit menneske blir rekna som rettferdig på grunn av gjerningar og ikkje berre ved tru.

²⁵På same måten var det med Rahab, ho som var prostituert: Vart ikkje ho rekna som rettferdig på grunn av gjerningar, fordi ho tok imot utsendingane og sleppte dei ut ein annan veg?

²⁶For liksom kroppen er død utan ånd, er trua død utan gjerningar.