Read nynorsk 2011 Jakob 3 Bible Online

Jakob 3 - nynorsk 2011 bible

Jakob 3

¹Mine brør, ikkje mange av dykk bør bli lærarar, for de veit at vi lærarar skal få ein strengare dom.

²Alle snublar vi ofte. Den som ikkje snublar og feilar i det han seier, er fullkomen, i stand til å halda heile kroppen i taumar.

³Vi legg beksel i munnen på hesten så han skal lystra oss, og då kan vi styra heile hesten.

⁴Ja, til og med store skip som blir drivne av sterke vindar, kan styrast med eit lite ror dit styrmannen vil.

⁵På same måten er det med tunga: Ho er ein liten kroppsdel, men ho kan skryta av si store makt. Ja, ein liten eld kan setja den største skog i brann!

⁶[6] Men tunga er òg ein eld, ho er ei verd av vondskap mellom lemene våre. Ho smittar heile kroppen og set livshjulet i brann, og blir sjølv sett i brann av helvete.

⁷Alt i naturen, både ville dyr og fuglar, krypdyr og fiskar, kan temjast og har vorte tamde av mennesket, som sjølv er ein del av naturen.

⁸Men tunga kan ikkje noko menneske temja, rastlaus og vond som ho er, full av drepande gift.

⁹Med henne lovprisar vi Herren vår Far, og med henne forbannar vi menneska som er skapte i Guds bilete.

¹⁰Frå same munnen kjem det både lovprising og forbanning. Slik må det ikkje vera, mine sysken!

¹¹Kan det vel strøyma både friskt og bittert vatn frå same kjelda?

¹²Sysken, kan eit fikentre bera oliven eller ein vinstokk bera fiken? Like lite kan ei salt kjelde gje ferskt vatn.

¹³Er nokon av dykk vis og vitug, då skal han syna det i gjerning, i eit rett liv som har vorte audmjukt gjennom visdom.

¹⁴Men ber de bitter misunning og sjølvhevding i hjartet, då må de ikkje skryta og lyga mot sanninga.

¹⁵Den slags visdom kjem ikkje ovanfrå, men er jordisk og sjeleleg, ja, demonisk.

¹⁶For der misunning og sjølvhevding rår, der er det ugreie og alt det som vondt er.

¹⁷Men visdomen ovanfrå er først og fremst rein. Dessutan elskar han fred og er forsonleg og føyeleg, rik på miskunn og gode frukter, upartisk og utan hykleri.

¹⁸Rettferda er ei frukt som blir sådd i fred og veks fram for dei som skaper fred.