Read nynorsk 2011 Jakob 5 Bible Online

Jakob 5 - nynorsk 2011 bible

Jakob 5

¹Og no, de rike! Gråt og jamra over all den ulukke som ventar dykk!

²Rikdomen dykkar har rotna, og kleda er mølletne;

³gullet og sølvet er rusta bort, og rusta skal vitna mot dykk og eta kroppen dykkar som eld. De har samla dykk skattar i endetida!

⁴[9] Men høyr: Ho ropar høgt, den løna de heldt att frå arbeidarane som skar åkrane dykkar, og klageropet frå dei som haustar inn, har nådd fram til Herren Sebaots øyre.

⁵I luksus og overflod har de levd på jorda og gjort hjarta dykkar feite til slaktedagen.

⁶Den rettferdige har de dømt og drepe, og ingen gjer motstand mot dykk.

⁷[10] Ver då tolmodige, sysken, til Herren kjem! Ein bonde må venta på den dyrebare grøda frå jorda og vera tolmodig til både haustregnet og vårregnet har falle.

⁸Slik må de òg vera tolmodige og gjera hjarta sterke, for Herren kjem snart.

⁹Klag ikkje på kvarandre, sysken, så de ikkje skal bli dømde. Sjå, dommaren står framfor døra.

¹⁰Ta profetane til føredøme, sysken, dei som tala i Herrens namn. Dei heldt tolmodig ut når dei måtte lida vondt.

¹¹Ja, alle som held ut, prisar vi sæle! De har høyrt korleis Job heldt ut, og har sett kva ende Herren lét han få. For Herren er rik på medkjensle og miskunn.

¹²Framfor alt må de ikkje sverja, mine sysken, verken ved himmelen eller jorda eller ved noko anna. Lat eit ja vera ja og eit nei vera nei, så de ikkje skal koma under dommen!

¹³Er det nokon av dykk som har det vondt? Då skal han be. Er nokon ved godt mot? Då skal han syngja lovsongar.

¹⁴[11] Er nokon av dykk sjuk, skal han kalla til seg dei eldste i forsamlinga, og dei skal be over han og salva han med olje i Herrens namn.

¹⁵Og bøna som er boren fram i tru, skal berga den sjuke, og Herren skal reisa han opp. Og har han gjort synder, skal han få dei tilgjevne.

¹⁶Vedkjenn då syndene for kvarandre og be for kvarandre, så de kan bli lækte. Bøna frå eit rettferdig menneske verkar med stor kraft.

¹⁷Elia var eit menneske under same kår som vi. Han bad inderleg at det ikkje skulle regna, og i tre år og seks månader fall det ikkje regn på jorda.

¹⁸Så bad han på nytt, og himmelen gav regn, og jorda bar atter si grøde.

¹⁹Mine sysken! Om ein av dykk forvillar seg bort frå sanninga og ein annan får han til å venda om,

²⁰då skal de vita: Den som får ein syndar til å venda om frå sine forvilla vegar, bergar sjela hans frå døden og løyner ei mengd med synder.