Read nynorsk 2011 1. Peter 5 Bible Online

1. Peter 5 - nynorsk 2011 bible

1. Peter 5

¹[13] Dei eldste mellom dykk legg eg dette på hjartet, eg som sjølv er ein eldste og eit vitne om Kristi lidingar og har del i den herlegdomen som skal openberrast:

²[14] Ver hyrdingar for den Guds flokk som er hos dykk! Ha tilsyn med flokken, ikkje av tvang, men av fri vilje, så som Gud vil, ikkje for vinning skuld, men av hjartet.

³Gjer dykk ikkje til herrar over dei som Gud har gjeve dykk ansvar for, men ver eit føredøme for flokken.

⁴Og når den høgste hyrdingen openberrar seg, skal de få den uvisnelege sigerskransen.

⁵[15] De unge skal underordna dykk dei eldste. Og for kvarandre skal de alle vera kledde i eit audmjukt sinnelag. For Gud står dei stolte imot, men dei audmjuke gjev han nåde.

⁶Audmjuk dykk då under Guds mektige hand, så han kan opphøgja dykk når tida kjem.

⁷Kast all dykkar uro på han, for han har omsorg for dykk.

⁸Ver edrue og vak! Motstandaren dykkar, djevelen, går omkring som ei brølande løve og leitar etter nokon å sluka.

⁹Stå han imot, faste i trua! For de veit at syskena dykkar rundt om i verda må gå gjennom dei same lidingane.

¹⁰Enno må de lida ei lita stund, men all nådes Gud, som ved Kristus har kalla dykk til sin evige herlegdom, han skal utrusta dykk, gje dykk kraft og styrke og grunnfesta dykk.

¹¹Han høyrer makta til i all æve. Amen.

¹²[16] Med hjelp frå Silvanus, som eg held for ein påliteleg bror, sender eg dette vesle brevet eg har skrive for å setja mot i dykk og vitna om Guds sanne nåde. I den må de bli ståande.

¹³[17] Syster dykkar i Babylon sender si helsing, ho som er utvald saman med dykk. Det same gjer Markus, son min.

¹⁴Hels kvarandre med kjærleikens kyss! Fred vere med dykk, alle som er i Kristus!