Read nynorsk 2011 2. Peter 1 Bible Online

2. Peter 1 - nynorsk 2011 bible

2. Peter 1

¹[1] Simeon Peter, Jesu Kristi tenar og apostel, helsar dei som har fått den same dyrebare tru som vi gjennom rettferda frå vår Gud og frelsar Jesus Kristus.

²Nåde og fred vere med dykk i rikt mål ved at de kjenner Gud og Jesus, vår Herre!

³Ja, alt vi treng for å leva i gudsfrykt, har hans guddomlege makt gjeve oss i gåve ved at vi kjenner han som kalla oss ved sin eigen herlegdom og styrke.

⁴Dermed har han gjeve oss dei største og mest dyrebare lovnader. Ved dei skulle de få del i guddomleg natur når de har kome dykk fri frå forfallet, som kjem frå lystene i verda.

⁵Set difor all dykkar iver inn på å la trua gå i følgje med eit rett liv, og det rette livet med innsikt,

⁶innsikta med måtehald, måtehaldet med tolmod, tolmodet med gudsfrykt,

⁷gudsfrykta med syskenkjærleik og syskenkjærleiken med kjærleik til alle.

⁸For når alt dette finst hos dykk og får veksa, då blir de ikkje uverksame eller utan frukt, de som kjenner vår Herre Jesus Kristus.

⁹Men har du ikkje dette, er du nærsynt, ja, blind; du har gløymt at du er reinsa for dine gamle synder.

¹⁰Difor, sysken, må de setja endå meir inn på å halda fast ved dykkar kall og utveljing. For gjer de dette, skal de aldri falla.

¹¹Då skal inngangen til vår Herre og frelsar Jesu Kristi evige rike stå vidopen for dykk.

¹²Difor vil eg alltid minna dykk om dette, endå de kjenner til det og er grunnfeste i den sanninga som har kome til dykk.

¹³[2] Eg meiner at det er rett å halda dykk vakne med slike påminningar, så lenge eg bur i dette teltet.

¹⁴For eg veit at teltet mitt snart skal takast ned, det har vår Herre Jesus Kristus late meg vita.

¹⁵Og eg vil gjera alt eg kan for at de alltid skal minnast dette, også etter at eg er gått bort.

¹⁶For vi følgde ikkje klokt uttenkte mytar då vi kunngjorde for dykk vår Herre Jesu Kristi makt og hans kome. Nei, vi var augnevitne og såg hans guddomlege velde.

¹⁷For han fekk ære og herlegdom frå Gud, sin Far, den gongen røysta kom til han frå høgste herlegdomen: «Dette er Son min, han som eg elskar, i han har eg mi glede.»

¹⁸Vi høyrde sjølve denne røysta koma frå himmelen då vi var saman med han på det heilage fjellet.

¹⁹Difor står profetordet så mykje fastare for oss. Og dette ordet gjer de vel i å halda fast på. Det er ei lampe som skin på ein mørk stad til dagen gryr og morgonstjerna stig opp i hjarta dykkar.

²⁰Men framfor alt skal de vita at ingen kan tyda eit profetord i Skrifta på eiga hand.

²¹For aldri vart noko profetord bore fram ved menneskevilje, men drivne av Den heilage ande tala menneske ord frå Gud.