Read nynorsk 2011 1. Johannes 1 Bible Online

1. Johannes 1 - nynorsk 2011 bible

1. Johannes 1

¹Det som var frå opphavet, det vi har høyrt, det vi har sett med våre eigne auge, det vi såg og det hendene våre rørte ved, sjølve livsens ord, det forkynner vi.

²Og livet vart openberra, vi har sett det og vitnar om det og forkynner for dykk det evige livet. Det var hos Far og vart openberra for oss.

³Det vi har sett og høyrt, forkynner vi òg for dykk, så de skal ha fellesskap med oss, vi som har fellesskap med Far og med hans Son, Jesus Kristus.

⁴Og dette skriv vi så gleda vår skal vera fullkomen.

⁵Dette er den bodskapen vi har høyrt av han og forkynner for dykk: Gud er lys; i han finst det ikkje mørker.

⁶Seier vi at vi har fellesskap med han, men vandrar i mørkret, då lyg vi og følgjer ikkje sanninga.

⁷[1] Men dersom vi vandrar i lyset, liksom han er i lyset, då har vi fellesskap med kvarandre, og blodet frå Jesus, hans Son, reinsar oss for all synd.

⁸Seier vi at vi ikkje har synd, då fører vi oss sjølve vill, og sanninga er ikkje i oss.

⁹Men dersom vi sannar syndene våre, er han trufast og rettferdig, så han tilgjev oss syndene og reinsar oss for all urettferd.

¹⁰Seier vi at vi ikkje har synda, då gjer vi han til løgnar, og hans ord er ikkje i oss.