Read nynorsk 2011 1. Johannes 5 Bible Online

1. Johannes 5 - nynorsk 2011 bible

1. Johannes 5

¹Kvar den som trur at Jesus er Kristus, er fødd av Gud. Og den som elskar han som har fødd oss, elskar òg det som er fødd av han.

²På dette kjenner vi at vi elskar Guds born: at vi elskar Gud og held hans bod.

³Å elska Gud er å halda hans bod, og hans bod er ikkje tunge.

⁴For alt som er fødd av Gud, sigrar over verda. Og det som har sigra over verda, er vår tru.

⁵Kven andre vinn over verda enn den som trur at Jesus er Guds Son?

⁶[11] Han, Jesus Kristus, er den som kom gjennom vatn og blod. Ikkje berre med vatnet, men med vatnet og blodet. Og Anden sjølv er vitne, for Anden er sanninga.

⁷[12] Så er det tre som vitnar:

⁸Anden og vatnet og blodet, og desse tre seier det same.

⁹Vi godtek vitnemål frå menneske, men Guds vitnemål er sterkare. For dette er Guds vitnemål: Han har vitna om sin eigen Son.

¹⁰Den som trur på Guds Son, har vitnemålet i sitt indre. Men den som ikkje trur Gud, har gjort han til løgnar, fordi han ikkje har trudd Guds eige vitnemål om sin Son.

¹¹Og dette er vitnemålet: Gud har gjeve oss evig liv, og dette livet er i hans Son.

¹²Den som har Sonen, har livet. Den som ikkje har Guds Son, har ikkje livet.

¹³Dette har eg skrive til dykk så de skal vita at de har evig liv, de som trur på namnet åt Guds Son.

¹⁴Og denne frimodige tilliten har vi til han: at han høyrer oss når vi bed om noko som er etter hans vilje.

¹⁵Og når vi veit at han høyrer oss, same kva vi bed om, då veit vi òg at vi alt har det vi har bede han om.

¹⁶Den som ser bror sin gjera ei synd som ikkje fører til død, skal be for han og slik gje han liv — så sant han ikkje er av dei som syndar til døden. Det finst synd som fører til død, men eg talar ikkje om bøn for slik synd.

¹⁷All urett er synd, men ikkje all synd fører til død.

¹⁸Vi veit at kvar den som er fødd av Gud, ikkje syndar. For han som er fødd av Gud, vernar han, så den vonde ikkje kan koma til.

¹⁹Vi veit at vi er av Gud, og at heile verda ligg i det vonde.

²⁰Og vi veit at Guds Son er komen, og han har gjeve oss forstand, så vi kjenner Den sanne. Vi er i Den sanne, vi som er i hans Son, Jesus Kristus. Han er den sanne Gud og det evige livet.

²¹Mine born, ta dykk i vare for dei falske gudane!