Read nynorsk 2011 Dommarane 10 Bible Online

Dommarane 10 - nynorsk 2011 bible

Dommarane 10

¹Etter Abimelek stod Tola fram og berga Israel. Han var son til Pua, som var son til Dod av Jissakar-stammen og budde i Sjamir på Efraim-fjellet.

²Han var dommar i Israel i tjuetre år. Så døydde han og vart gravlagd i Sjamir.

³Etter han stod Ja'ir frå Gilead fram. Han var dommar i Israel i tjueto år.

⁴Han hadde tretti søner; dei reid på tretti esel og hadde tretti byar som enno i dag blir kalla Ja'irs teltbyar. Dei ligg i Gilead-landet.

⁵Så døydde Ja'ir og vart gravlagd i Kamon.

⁶På nytt gjorde israelittane det som var vondt i HERRENS auge. Dei dyrka Baal-gudane og Astarte-bileta, dei dyrka gudane til folket i Aram, Sidon og Moab, og dei dyrka gudane til ammonittane og filistrane. Dei forlét HERREN, dei tente ikkje han.

⁷Då flamma HERRENS harme opp mot israelittane, og han gav dei i hendene på filistrane og ammonittane.

⁸Dette året knuste dei israelittane. I atten år undertrykte dei alle israelittane som budde aust for Jordan, i amorittlandet, i Gilead.

⁹Ammonittane sette jamvel over Jordan og gjekk til krig mot Juda, Benjamin og Efraims hus. Og israelittane kom i stor naud.

¹⁰Då ropa israelittane til HERREN og sa: «Vi har synda mot deg. Vi har vendt oss bort frå vår Gud og dyrka Baal-gudane.»

¹¹HERREN svara: «Har eg ikkje frelst dykk frå egyptarane, amorittane, ammonittane og filistrane?

¹²Då sidonarane, amalekittane og midjanittane plaga dykk, ropa de til meg, og eg berga dykk ut av hendene deira.

¹³Men de forlét meg og dyrka andre gudar. Difor vil eg ikkje berga dykk meir.

¹⁴Gå og rop til dei gudane som de har valt! Lat dei frelsa dykk no når de er i naud.»

¹⁵Då sa israelittane til HERREN: «Vi har synda. Gjer med oss som du synest, berre du vil hjelpa oss denne gongen!»

¹⁶Dei fjerna dei framande gudane dei hadde hos seg, og tente HERREN. Då heldt han ikkje ut å sjå på Israels naud.

¹⁷Ammonittane samla seg til strid og slo leir i Gilead. Israelittane fylka seg og slo leir i Mispa.

¹⁸Då sa folket og hovdingane i Gilead til kvarandre: «Kvar er den mannen som vil gå først i striden mot ammonittane? Han skal vera hovding over alle som bur i Gilead.»