Read nynorsk 2011 Dommarane 11 Bible Online

Dommarane 11 - nynorsk 2011 bible

Dommarane 11

¹Jefta frå Gilead var ein djerv krigar. Han var son til ei prostituert kvinne, og Gilead var far til Jefta.

²Med kona si hadde Gilead òg søner. Då desse sønene vart vaksne, jaga dei Jefta bort og sa til han: «Du får ikkje noko av arven etter far vår, for du er son til ei anna kvinne.»

³[23] Då rømde Jefta for brørne sine og slo seg ned i Tob-landet. Nokre simple menn som gjekk og dreiv, samla seg om Jefta og drog ut med han på tokta hans.

⁴Ei tid etter gjekk ammonittane til krig mot Israel.

⁵Då ammonittane gjekk til åtak på israelittane, tok dei eldste i Gilead ut og ville henta Jefta heim frå Tob.

⁶Dei sa til Jefta: «Kom og ver hærføraren vår, så vil vi kjempa mot ammonittane.»

⁷Men Jefta sa til dei eldste i Gilead: «Var det ikkje de som hata meg og dreiv meg bort frå farshuset mitt? Kvifor kjem de til meg no når de er i naud?»

⁸Dei eldste frå Gilead svara Jefta: «Det er då difor vi vender oss til deg att. Går du med oss og kjempar mot ammonittane, skal du vera hovdingen vår og rå over alle som bur i Gilead.»

⁹Då sa Jefta til dei eldste i Gilead: «Om de tek meg med heim for å kjempa mot ammonittane og HERREN gjev dei i mi makt, skal eg vera hovdingen dykkar.»

¹⁰Dei eldste i Gilead svara: «HERREN skal vera vitne mellom oss om vi ikkje gjer som du seier.»

¹¹Då gjekk Jefta med dei eldste i Gilead, og folket gjorde han til hovding og hærførar. Framfor HERREN i Mispa tok Jefta opp att alt han hadde sagt.

¹²Jefta sende bod til ammonittkongen og sa: «Har vi noko uoppgjort med kvarandre sidan du kjem hit og gjer åtak på landet mitt?»

¹³[24] Ammonittkongen svara sendemennene frå Jefta: «Då Israel kom frå Egypt, tok dei landet mitt mellom Arnon og Jabbok, heilt bort til Jordan. Lat meg no få det att med det gode!»

¹⁴Endå ein gong sende Jefta bod til ammonittkongen

¹⁵og sa til han: Så seier Jefta: Israel har ikkje teke landet frå Moab eller ammonittane.

¹⁶Då Israel drog opp frå Egypt, gjekk dei gjennom ørkenen til Sivsjøen og kom til Kadesj.

¹⁷Då sende Israel bod til kongen i Edom og sa: «Lat oss få fara gjennom landet ditt!» Men kongen i Edom høyrde ikkje på dei. Til Moab-kongen sende dei òg bod. Men heller ikkje han ville høyra på dei. Så gav Israel seg til i Kadesj.

¹⁸Då dei sidan heldt fram gjennom ørkenen, fór dei utanom Edom og Moab. Dei nådde områda aust for Moab og slo leir på hi sida av Arnon. Dei kom ikkje inn på Moabs grunn, for Arnon er grensa mot Moab.

¹⁹Så sende Israel bod til kongen i Hesjbon, amorittkongen Sihon, og sa til han: «Lat oss få fara gjennom landet ditt, så vi kjem dit vi skal.»

²⁰Men Sihon trudde ikkje Israel så vel at han torde la dei fara gjennom landet sitt. Difor samla han heile hæren sin og slo leir ved Jahsa. Så gjekk han til krig mot Israel.

²¹Men HERREN, Israels Gud, gav Sihon og heile hæren hans i hendene på israelittane, og Israel slo dei. Så tok Israel heile landet til amorittane som budde der.

²²Heile amorittlandet tok dei, frå Arnon til Jabbok og frå ørkenen til Jordan.

²³Det er HERREN, Israels Gud, som har drive amorittane bort og gjeve landet til Israel, folket sitt. Og no vil du driva dei bort!

²⁴Er det ikkje slik at det som Kemosj, guden din, lèt deg ta, det tek du, og alt det HERREN vår Gud lèt oss ta, det tek vi?

²⁵Er du så mykje betre enn Balak, son til Sippor, Moab-kongen? Stridde han mot Israel? Gjekk han til åtak på dei?

²⁶No er det tre hundre år sidan Israel busette seg i Hesjbon og byane der omkring, i Aroer og byane der omkring og i alle byane langsmed Arnon. Kvifor har de ikkje teke dei att i heile denne tida?

²⁷Eg har ikkje synda mot deg; men du gjer meg stor urett når du no går til krig mot meg. HERREN, som er dommaren, skal i dag dømma mellom israelittane og ammonittane.

²⁸Men ammonittkongen ville ikkje høyra på det sendemennene frå Jefta sa til han.

²⁹Då kom HERRENS ande over Jefta, og han fór gjennom Gilead og Manasse. Han fór heilt til Mispa i Gilead, og derifrå drog han ut mot ammonittane.

³⁰Og Jefta gav HERREN ein lovnad og sa: «Gjev du ammonittane i mine hender,

³¹[25] så skal den første som går ut gjennom husdøra mi og møter meg når eg kjem velberga tilbake frå krigen mot ammonittane, høyra HERREN til. Eg skal bera han fram som brennoffer.»

³²Så drog Jefta ut og kjempa mot ammonittane, og HERREN gav dei over i hans hender.

³³Han slo dei og tok landet frå Aroer til bort imot Minnit, med tjue byar, og området heilt til Abel-Keramim. Det vart eit stort mannefall, og ammonittane måtte bøya seg under israelittane.

³⁴Då Jefta kom heim att til Mispa, gjekk dotter hans ut imot han med handtrommer og dans. Ho var einaste barnet hans; utanom henne hadde han verken son eller dotter.

³⁵[26] Med det same han fekk sjå henne, reiv han sund kleda sine og ropa: «Å, dotter mi, for ei sorg du valdar meg, for ei ulukke du fører meg i! Eg har gjeve HERREN ein lovnad, og eg kan ikkje ta att ordet mitt.»

³⁶Då sa ho til han: «Far, har du gjeve HERREN ein lovnad, så gjer med meg som du har sagt, sidan HERREN lét deg få hemn over ammonittane, fiendane dine.

³⁷Men éin ting ville eg gjerne at du gav meg lov til», sa ho til far sin. «Lat meg få vera fri i to månader, så eg kan gå omkring på fjella med veninnene mine og gråta over at eg må døy som jomfru.»

³⁸«Gå du!» svara han, og han lét henne vera borte i to månader. Så gjekk ho på fjella med veninnene sine og gret over jomfrudomen sin.

³⁹Men då dei to månadene var til ende, kom ho heim att til far sin, og han gjorde med henne det som han hadde lova. Ho hadde aldri vore nær nokon mann. Sidan har det vore ein skikk i Israel

⁴⁰at israelittiske døtrer fire dagar i året går ut og syng klagesongar til minne om dotter til Jefta frå Gilead.