Read nynorsk 2011 Dommarane 13 Bible Online

Dommarane 13 - nynorsk 2011 bible

Dommarane 13

¹På nytt gjorde israelittane det som var vondt i HERRENS auge. Då gav HERREN dei i hendene på filistrane i førti år.

²[30] Det var ein mann frå Sora, frå Dan-slekta, han heitte Manoah. Kona hans var barnlaus; ho kunne ikkje få born.

³HERRENS engel synte seg for henne og sa: «Eg veit at du er barnlaus og ikkje kan få born. Men du skal bli med barn og føda ein son.

⁴Pass difor på at du ikkje drikk vin eller sterk drikk og ikkje et noko ureint!

⁵[31] For sjå, du skal bli med barn og føda ein son. Det må aldri koma rakekniv på hovudet hans, for guten skal vera ein Guds nasirear alt frå mors liv, og med han skal berginga av Israel frå filistrane ta til.»

⁶Kvinna gjekk til mannen sin og sa: «Det kom ein gudsmann til meg. Han var å sjå til som Guds engel og fylte meg med redsle. Eg spurde ikkje kvar han var ifrå, og ikkje sa han meg namnet sitt.

⁷Han sa til meg: Du skal bli med barn og få ein son. Drikk no ikkje vin eller sterk drikk og et ikkje noko ureint! For guten skal vera ein Guds nasirear frå mors liv og til sin døyande dag.»

⁸Då bad Manoah til HERREN og sa: «Høyr meg, Herre! Lat den gudsmannen som du sende, koma hit att og læra oss kva vi skal gjera med guten som skal bli fødd.»

⁹Gud høyrde Manoahs bøn. Guds engel kom att til kvinna ein gong ho sat utpå marka og Manoah, mannen hennar, ikkje var med henne.

¹⁰Då skunda kvinna seg og sprang heim og fortalde mannen sin: «No har han synt seg for meg att, den mannen som kom til meg her om dagen.»

¹¹Manoah reiste seg og følgde kona si. Då han kom ut til mannen, spurde han: «Er du den mannen som tala til kona mi?» «Ja», svara han.

¹²Då sa Manoah: «Når det no går som du har sagt, korleis skal vi då oppføra oss overfor guten, og kva skal vi gjera med han?»

¹³HERRENS engel svara Manoah: «Alt det eg nemnde for kona di, må ho passa seg for.

¹⁴Ho må ikkje eta noko som kjem frå vintreet, ikkje drikka vin eller sterk drikk og ikkje eta noko ureint. Alt det eg har pålagt henne, skal ho halda seg etter.»

¹⁵Då sa Manoah til HERRENS engel: «Vil du ikkje stansa ei stund så vi får stella til eit kje for deg?»

¹⁶Men HERRENS engel svara Manoah: «Om du får meg til stansa, et eg likevel ikkje av maten din. Men vil du laga til eit brennoffer, skal du ofra det til HERREN!» Manoah visste ikkje at det var HERRENS engel.

¹⁷Difor sa han til Herrens engel: «Kva er namnet ditt, så vi kan æra deg når det hender, det du har sagt?»

¹⁸Då sa HERRENS engel: «Kvifor spør du om namnet mitt? Det er eit underfullt namn!»

¹⁹Så tok Manoah kjeet og grødeofferet og ofra det der på berget til HERREN, han som gjer under. Medan Manoah og kona hans stod og såg på,

²⁰hende det noko. Då logen steig opp frå altaret mot himmelen, fór HERRENS engel opp i logen frå altaret. Då Manoah og kona hans såg det, kasta dei seg ned med andletet mot jorda.

²¹HERRENS engel synte seg ikkje oftare for Manoah og kona hans. Då skjøna Manoah at det var HERRENS engel,

²²[32] og han sa til kona si: «No må vi døy, for vi har sett Gud.»

²³Men kona svara: «Hadde HERREN vilja drepa oss, hadde han ikkje teke imot brennoffer og grødeoffer av oss. Han hadde ikkje late oss sjå alt dette og ikkje høyra slikt som vi har høyrt.»

²⁴[33] Kona fødde ein son og kalla han Samson. Guten voks opp, og HERREN velsigna han.

²⁵Og HERRENS ande tok til å driva han medan han var i Dan-leiren mellom Sora og Esjtaol.