Read nynorsk 2011 Dommarane 17 Bible Online

Dommarane 17 - nynorsk 2011 bible

Dommarane 17

¹I Efraim-fjella budde det ein mann som heitte Mika.

²Ein dag sa han til mor si: «Dei elleve hundre sjekel sølv som vart tekne frå deg — eg høyrde sjølv at du uttala forbanninga — dei pengane er hos meg; det er eg som har teke dei.» Mor hans sa: «HERREN velsigne deg, son min!»

³Då han gav dei elleve hundre sjekel sølv tilbake til mor si, sa ho: «Eg helgar desse pengane til HERREN og gjev dei til son min for å få laga eit utskore gudebilete og eit støypt bilete. No gjev eg dei tilbake til deg.»

⁴Han gav pengane til mora, som tok to hundre sjekel og gav dei til ein gullsmed. Han laga eit utskore gudebilete og eit støypt bilete; dei stod sidan i huset til Mika.

⁵[41] Mika hadde eit gudshus. Han hadde laga ein efod og nokre terafar og sett ein av sønene sine til å vera prest for seg.

⁶I dei dagane var det ingen konge i Israel. Kvar gjorde som han sjølv fann for godt.

⁷Det var ein ung mann frå Betlehem i Juda, frå Juda-slekta. Han var ein levitt som hadde slege seg ned der.

⁸Mannen drog frå den byen, frå Betlehem i Juda, for å finna ein plass der han kunne slå seg ned. På ferda si kom han til huset åt Mika i Efraim-fjella.

⁹Mika spurde han: «Kvar kjem du frå?» Han svara: «Eg er ein levitt frå Betlehem i Juda, og no er eg ute og ferdast og vil finna ein plass der eg kan slå meg ned.»

¹⁰Då sa Mika til han: «Ver her hos meg og ver far og prest for meg! Eg skal gje deg ti sjekel sølv i året og halda deg med mat og klede.» Levitten kom,

¹¹og han gjekk med på å vera hos mannen og vart som ein av sønene hans.

¹²Mika sette den unge levitten til prest hos seg, og han vart verande i huset til Mika.

¹³Mika sa: «No veit eg at HERREN vil gjera vel mot meg, sidan eg har fått ein levitt til prest.»