Read nynorsk 2011 Dommarane 3 Bible Online

Dommarane 3 - nynorsk 2011 bible

Dommarane 3

¹Dette er dei folkeslaga som HERREN lét vera att. — Han ville bruka dei til å setja Israel på prøve, dei av Israel som ikkje hadde vore med i alle krigane om Kanaan.

²Dette gjorde han for at dei komande slektene av israelittar skulle læra å føra krig, men berre dei som ikkje hadde vore med før. —

³Det var hovdingane for dei fem filistarbyane, alle kanaanearane, sidonarane og hevittane som budde i Libanon-fjella, frå Baal-Hermon-fjellet til Lebo-Hamat.

⁴Ved dei vart Israel sett på prøve, så det kunne visa seg om dei ville lyda boda som HERREN hadde gjeve fedrane deira gjennom Moses.

⁵Israelittane budde midt imellom kanaanearane, hetittane, amorittane, perisittane, hevittane og jebusittane.

⁶Dei tok døtrene deira til koner og gav sjølve døtrene sine til sønene deira, og dei dyrka gudane deira.

⁷[6] Israelittane gjorde det som var vondt i HERRENS auge; dei gløymde HERREN sin Gud og dyrka Baal-gudane og Asjera-gudinnene.

⁸Då flamma HERRENS vreide opp mot israelittane, og han gav dei i hendene på Kusjan-Risjatajim, kongen i Aram-Naharajim. Israelittane måtte tena Kusjan-Risjatajim i åtte år.

⁹Då ropa israelittane til HERREN, og HERREN lét ein redningsmann stå fram i Israel, og han frelste dei. Det var Otniel, son til Kenas, yngste bror til Kaleb.

¹⁰HERRENS ande kom over han, og han vart dommar i Israel. Han drog ut i strid, og HERREN gav kongen i Aram, Kusjan-Risjatajim, over i hans hender. Han fekk makta over Kusjan-Risjatajim,

¹¹og landet hadde fred i førti år. Så døydde Otniel, son til Kenas.

¹²Israelittane gjorde på nytt det som vondt var i HERRENS auge. Då gav HERREN Moab-kongen Eglon makt over dei fordi dei hadde gjort det som var vondt i HERRENS auge.

¹³Han fekk med seg ammonittane og amalekittane og drog ut og slo Israel, og dei tok Palmebyen.

¹⁴Israelittane måtte tena Eglon, Moab-kongen, i atten år.

¹⁵Då ropa israelittane til HERREN, og HERREN lét ein redningsmann stå fram, benjaminitten Ehud, son til Gera, ein venstrehendt mann. Israelittane sende han med ei gåve til Eglon, kongen i Moab.

¹⁶[7] Ehud laga seg eit tvieggja sverd som var ein gomed langt, og spente det på seg under kleda ved den høgre hofta.

¹⁷Så førte han gåva fram for Eglon, kongen i Moab. Eglon var ein svært tjukk mann.

¹⁸Då Ehud hadde bore gåva fram, sende han bort dei som hadde bore gåva.

¹⁹Sjølv snudde han ved Pesilim, som er ved Gilgal, drog tilbake og sa: «Eg har ein hemmeleg bodskap til deg, konge.» Då sa kongen: «Stille!» Så gjekk dei ut, alle som stod til teneste for han.

²⁰Då Ehud kom inn til kongen, sat han åleine i det svale takkammeret sitt. Ehud sa til han: «Eg har ein bodskap frå Gud til deg.» Kongen reiste seg frå stolen.

²¹Ehud rekte ut venstrehanda, greip sverdet frå høgre hofta og støytte det inn i magen på han

²²så skjeftet følgde med sverdbladet inn. Feittet lukka seg rundt bladet, for han drog ikkje sverdet ut or magen på han, og mageinnhaldet valt ut.

²³Ehud gjekk ut i forhallen, lét dørene til takkammeret att etter seg og låste.

²⁴Då han hadde gått, kom tenarane til kongen. Dei fekk sjå at dørene til takkammeret var låste, og tenkte: «Han har vel eit nødvendig ærend i det svale kammerset.»

²⁵Dei venta lenge. Men då han ikkje opna dørene, tok dei nøkkelen og låste opp. Og der låg herren deira døyande på golvet.

²⁶Men Ehud slapp unna medan dei andre var tvilrådige; han var alt komen forbi Pesilim og flykta vidare mot Se'ir.

²⁷Då han kom fram, bles han i bukkehornet i Efraim-fjella. Israelittane drog ned med han frå fjellet, og han gjekk føre dei.

²⁸«Følg etter meg», sa han til dei, «for HERREN har gjeve fiendane dykkar, moabittane, i dykkar hender!» Dei drog ned etter han og tok vadestadene over Jordan til Moab. Dei lét ikkje ein einaste sleppa over.

²⁹Den gongen felte dei ti tusen moabittar, alle kraftige og modige menn; ikkje ein kom seg unna.

³⁰Moab måtte bøya seg under Israels hand den dagen, og så hadde landet fred i åtti år.

³¹Etter Ehud kom Sjamgar, son til Anat. Han felte seks hundre mann av filistrane med ein piggstav til å driva oksar med. Også han berga Israel.