Read nynorsk 2011 Dommarane 4 Bible Online

Dommarane 4 - nynorsk 2011 bible

Dommarane 4

¹På nytt gjorde israelittane det som var vondt i HERRENS auge, no då Ehud var død.

²HERREN gav dei i hendene på kanaanearkongen Jabin, som styrte i Hasor. Hærføraren hans heitte Sisera; han heldt til i Harosjet-Haggojim.

³Israelittane ropa til HERREN. For Jabin hadde ni hundre jernvogner, og han kua israelittane med makt i tjue år.

⁴På den tida var profetkvinna Debora, kona til Lappidot, dommar i Israel.

⁵Ho brukte å sitja under Debora-palmen mellom Rama og Betel i Efraim-fjella. Israelittane kom til henne for å få dom i rettstvistar.

⁶Debora sende bod etter Barak, son til Abinoam, frå Kedesj i Naftali-landet og sa til han: «Høyr kva HERREN, Israels Gud, byd deg: Gå av stad og dra opp på Tabor-fjellet! Ta med deg ti tusen mann frå Naftali og Sebulon.

⁷Så skal eg få Sisera, Jabins hærførar, til å dra ut mot deg med vogner og troppar ved Kisjon-dalen. Eg gjev han i dine hender.»

⁸Barak sa til henne: «Går du med, skal eg gå, men går du ikkje med meg, går ikkje eg.»

⁹Då sa ho: «Visst skal eg gå med deg. Men då er det ikkje du som får æra for den ferda du gjer. For HERREN vil overgje Sisera i handa til ei kvinne.» Så drog Debora med Barak til Kedesj.

¹⁰Barak kalla Sebulon og Naftali saman i Kedesj. Så drog han av stad, og bak han marsjerte ti tusen mann. Debora drog saman med han.

¹¹[8] Kenitten Heber hadde skilt lag med dei andre kenittane, som var etterkomarar av Hobab, svogeren til Moses, og hadde slege opp telta sine ved Elon-Saanannim, ved Kedesj.

¹²Sisera fekk melding om at Barak, son til Abinoam, hadde drege opp på Tabor-fjellet.

¹³Han samla alle vognene sine, ni hundre jernvogner, og heile den hærstyrken han hadde, og førte dei frå Harosjet-Haggojim til Kisjon-dalen.

¹⁴Då sa Debora til Barak: «Opp! For dette er dagen då HERREN vil gje Sisera i dine hender. HERREN går føre deg!» Så drog Barak ned frå Tabor-fjellet, og ti tusen mann var med han.

¹⁵Då Barak gjekk til åtak, slo HERREN Sisera og alle stridsvognene hans og heile hæren hans med forvirring. Sisera steig ned av vogna og rømde til fots,

¹⁶medan Barak sette etter vognene og hæren heilt til Harosjet-Haggojim. Heile hæren til Sisera fall for sverdet. Ikkje ein einaste vart att.

¹⁷Sisera sjølv rømde til fots og kom til teltet der Jael, kona til kenitten Heber, heldt til. For det rådde fred mellom Jabin, kongen i Hasor, og slekta til Heber.

¹⁸Jael gjekk ut og møtte Sisera. «Kom inn, herre, kom inn til meg», sa ho. «Ver ikkje redd!» Han kom inn i teltet til henne, og ho dekte han til med eit teppe.

¹⁹Han bad henne: «Ver snill og gjev meg litt vatn, for eg er så tørst!» Ho opna ei skinnflaske med mjølk, lét han få drikka og dekte han til att.

²⁰Så sa han til henne: «Stå i teltopninga! Kjem det ein og spør om det er nokon her, skal du svara nei.»

²¹Jael, kona til Heber, greip ein teltplugg og tok ein hammar i handa. Så gjekk ho stille inn til han og slo pluggen gjennom tinningen på han så pluggen gjekk ned i jorda. Han hadde lege utmatta og sove, og slik døydde han.

²²I det same kom Barak, som forfølgde Sisera. Jael gjekk ut og møtte han. Ho sa: «Kom, så skal eg visa deg mannen du leitar etter!» Han gjekk med henne inn, og sjå, der låg Sisera død med teltpluggen gjennom tinningen.

²³Den dagen audmjuka Gud kanaanearkongen Jabin framfor israelittane.

²⁴Og handa til israelittane vart meir og meir tyngjande for kanaanearkongen Jabin, heilt til dei gjorde ende på Jabin, kongen i Kanaan.