Read nynorsk 2011 1. Samuelsbok 16 Bible Online

1. Samuelsbok 16 - nynorsk 2011 bible

1. Samuelsbok 16

¹ HERREN sa til Samuel: «Kor lenge vil du sørgja over Saul? Eg har vraka han som konge over Israel. Fyll hornet ditt med olje og gå! Eg sender deg til Isai i Betlehem, for eg har sett meg ut ein av sønene hans til konge.»

²Samuel svara: «Korleis kan eg fara dit? Får Saul høyra det, drep han meg.» Då sa HERREN: «Ta med deg ei kvige og sei at du kjem og vil ofra til HERREN.

³Bed så Isai til ofringa! Sidan lèt eg deg vita kva du så skal gjera. Du skal salva for meg han eg viser deg.»

⁴Samuel gjorde som HERREN hadde sagt. Då han kom til Betlehem, gjekk dei eldste i byen skjelvande imot han og spurde: «Kjem du i fredeleg ærend?»

⁵Han svara: «Ja, eg er komen for å ofra til HERREN. Gjer dykk reine og heilage og ver med meg til ofringa.» Så helga han Isai og sønene hans og bad inn til høgtida.

⁶Då dei så kom og han fekk sjå Eliab, sa han til seg sjølv: «Her, framfor HERREN, står no hans salva.»

⁷Men HERREN sa til Samuel: «Sjå ikkje på skapnaden hans og den høge voksteren, for eg har vraka han. Her gjeld ikkje det som menneske ser. For menneska ser det som auga ser, men HERREN ser på hjartet.»

⁸Då ropa Isai på Abinadab og lét han gå fram for Samuel. Men Samuel sa: «Heller ikkje han har HERREN valt ut.»

⁹Så lét Isai Sjamma gå fram; men Samuel sa: «Heller ikkje han har HERREN valt ut.»

¹⁰Slik lét Isai dei sju sønene gå fram for Samuel. Men Samuel sa til Isai: «HERREN har ikkje valt ut nokon av desse.»

¹¹Då spurde Samuel: «Var dette alle gutane dine?» Isai svara: «Det er endå ein att, den yngste. Han er ute og gjeter småfeet.» Då sa Samuel: «Send bod etter han! Vi set oss ikkje til bords før han kjem.»

¹²Så sende Isai bod etter han. Han var raudleitt, hadde vakre auge og var vakker å sjå til. HERREN sa: «Reis deg og salva han! For han er det.»

¹³Då tok Samuel hornet med olje og salva han midt mellom brørne hans. Frå den dagen kom HERRENS ande over David og var med han sidan. Så braut Samuel opp og drog heim att til Rama.

¹⁴HERRENS ande forlét Saul, og ei vond ånd frå HERREN skremde han.

¹⁵Då sa Sauls menn til han: «Vi ser at ei vond ånd frå Gud skremmer deg.

¹⁶Sei berre frå, herre, så skal tenarane dine som står her framfor deg, leita opp ein mann som kan spela på harpe. Når ei vond ånd frå Gud kjem over deg, skal han spela på harpa. Det vil gje deg lindring.»

¹⁷Saul svara: «Ja, finn meg ein mann som er god til å spela, og før han hit til meg!»

¹⁸Ein av dei unge mennene sa: «Eg har sett ein son til Isai frå Betlehem som kan spela. Han er ein modig og djerv krigar; han snakkar forstandig og er ein vakker mann. Og HERREN er med han.»

¹⁹Så sende Saul bod til Isai og sa: «Send hit til meg David, son din, han som gjeter småfeet!»

²⁰Då tok Isai eit esel, leste det med brød, ein skinnsekk med vin og eit kje og sende det med David, son sin, til Saul.

²¹Slik kom David til Saul og gav seg i teneste hos han. Saul vart svært glad i han og gjorde han til våpenberaren sin.

²²Han sende bod til Isai og sa: «Lat David få vera i teneste hos meg, for eg synest godt om han.»

²³Når så ei vond ånd frå Gud kom over Saul, tok David fram harpa si og spela på henne, og Saul fekk lindring. Det vart betre med han, og den vonde ånda forlét han.