Read nynorsk 2011 1. Samuelsbok 23 Bible Online

1. Samuelsbok 23 - nynorsk 2011 bible

1. Samuelsbok 23

¹[68] David fekk melding om at filistrane hadde gått til åtak på Ke'ila og plyndra treskjeplassane.

²Då bad David HERREN om råd: «Skal eg dra ut og slå desse filistrane?» HERREN svara: «Dra ut og slå filistrane og fri ut Ke'ila.»

³Men mennene til David sa til han: «Ikkje eingong her i Juda er vi trygge, og så skulle vi dra til Ke'ila, mot hæren til filistrane?»

⁴Endå ein gong bad David HERREN om råd, og HERREN svara: «Bryt opp og dra ned til Ke'ila! Eg vil gje filistrane i dine hender.»

⁵Så drog David og mennene hans til Ke'ila og kjempa mot filistrane. Dei dreiv buskapen deira bort og lét dei lida eit stort nederlag. Slik berga David folket i Ke'ila.

⁶[69] Då Abjatar, son til Ahimelek, rømde til David og følgde han til Ke'ila, hadde han efoden med seg.

⁷Saul fekk melding om at David var komen til Ke'ila, og han sa: «Gud har gjeve han i mi hand. For han stengde seg sjølv inne då han drog inn i ein by med portar og bommar.»

⁸Så kalla Saul heile hæren saman til kamp. Han ville fara ned til Ke'ila for å kringsetja David og mennene hans.

⁹Men då David skjøna at Saul la vonde planar mot han, sa han til presten Abjatar: «Ta fram efoden!»

¹⁰Så sa David: «HERRE, Israels Gud! Tenaren din har høyrt at Saul tenkjer seg til Ke'ila og vil øydeleggja byen for mi skuld.

¹¹Vil leiarane i Ke'ila utlevera meg til han? Kjem Saul hit ned, slik som tenaren din har fått nyss om? HERRE, Israels Gud, fortel tenaren din dette!» HERREN svara: «Ja, han kjem hit ned.»

¹²David heldt fram: «Vil leiarane i Ke'ila utlevera meg og mennene mine til Saul?» HERREN svara: «Ja, dei vil utlevera dykk.»

¹³No braut David opp med mennene sine, om lag seks hundre i talet. Dei drog bort frå Ke'ila og flakka omkring der det fall seg. Men då Saul fekk høyra at David hadde sloppe bort frå Ke'ila, lét han vera å dra ut.

¹⁴[70] Etter dette heldt David til i ørkenen, i fjellborgene. Han slo seg til i fjellet i Sif-ørkenen. Og heile tida leita Saul etter han, men Gud lét han ikkje falla i hans hender.

¹⁵Medan David var i Horesja i Sif-ørkenen, fekk han vita at Saul hadde drege ut for å drepa han.

¹⁶Men Jonatan, son til Saul, drog av garde og kom til David i Horesja. Han hjelpte han til å henta nytt mot hos Gud.

¹⁷«Ver ikkje redd!» sa han. «Saul, far min, får ikkje tak i deg. Du skal bli konge over Israel, og eg skal vera nest etter deg. Det veit Saul, far min, òg.»

¹⁸Så gjorde dei to ei pakt med kvarandre for HERRENS andlet. David vart verande i Horesja, men Jonatan gjekk heim til seg.

¹⁹Nokre menn frå Sif drog opp til Saul i Gibea og sa: «Veit du at David held seg gøymd hos oss i fjellborgene i Horesja, ved Hakila-haugen som ligg sør for Jesjimon?

²⁰Så sant du ønskjer å koma dit ned, konge, så kom! Vi skal syta for at du får tak i han.»

²¹Saul svara: «Velsigna er de av HERREN fordi de held med meg.

²²Gå no, og ver framleis på vakt. Få greie på kvar han ferdast, og kven som har sett han der. For dei har sagt meg at han er svært listig.

²³Sjå etter og finn alle gøymestadene der han kan ha gøymt seg. Kom så tilbake til meg med påliteleg melding, og eg skal vera med dykk. Så sant han er i landet, skal eg leita han opp mellom alle slektene i Juda.»

²⁴[71] Då braut dei opp og drog til Sif i førevegen for Saul. David og mennene hans var då i Maon-ørkenen, på Araba-sletta, sør for Jesjimon.

²⁵Saul og mennene hans drog ut for å leita etter han. Men det fekk David vita, og han drog ned til berghamaren i Maon-ørkenen og vart verande der. Då Saul fekk høyra det, følgde han etter David ut i Maon-ørkenen.

²⁶Saul gjekk på den eine sida av fjellet og David og mennene hans på den andre. David flykta for å koma unna Saul. Men Saul og mennene hans var i ferd med å omringa David og mennene hans og ta dei.

²⁷Då kom det ein bodberar til Saul og sa: «Skund deg og kom! Filistrane har rykt inn i landet.»

²⁸Då heldt Saul opp med å forfølgja David og drog mot filistrane. Difor kallar dei den staden Sela-ha-Mahlekot, «Skiljehamaren».