Read nynorsk 2011 1. Samuelsbok 26 Bible Online

1. Samuelsbok 26 - nynorsk 2011 bible

1. Samuelsbok 26

¹Mennene frå Sif kom til Saul i Gibea og sa: «Du veit vel at David held seg løynd ved Hakila-høgda, midt imot Jesjimon?»

²Då braut Saul opp og drog ned til Sif-ørkenen med tre tusen utvalde israelittar for å leita etter David.

³Saul slo leir på Hakila-høgda, som ligg ved vegen midt imot Jesjimon. David heldt til i ørkenen, og då han skjøna at Saul var komen etter han dit,

⁴sende han ut spionar og fekk påliteleg melding om at Saul var der.

⁵Då braut David opp og kom til den staden der Saul hadde slege leir. Han såg kvar Saul og hærføraren hans, Abner, son til Ner, hadde lagt seg til å sova. Saul låg midt i leiren med soldatane rundt seg.

⁶David tok til orde og spurde hetitten Ahimelek og Abisjai, son til Seruja og bror til Joab: «Kven vil gå ned med meg i leiren til Saul?» Abisjai svara: «Eg vil gå ned med deg.»

⁷Då David og Abisjai kom bort til hæren om natta, låg Saul og sov midt i leiren. Spydet hans var stukke ned i jorda like ved hovudet hans, og Abner og krigsfolket låg rundt han.

⁸Abisjai sa til David: «I dag har Gud gjeve fienden i di hand. Lat meg få spidda han til jorda i ein einaste støyt. Ein støyt med spydet er nok.»

⁹Men David svara Abisjai: «Drep han ikkje! Kven kan ustraffa leggja hand på den HERREN har salva?»

¹⁰Og han heldt fram: «Så sant HERREN lever, HERREN skal sjølv slå han, anten han døyr når timen hans kjem, eller han fell i krig.

¹¹HERREN fri meg frå å leggja hand på den HERREN har salva! Men ta spydet som står ved hovudet hans, og vasskrukka, og lat oss gå vår veg.»

¹²Så tok David spydet og vasskrukka ved hovudet til Saul, og dei gjekk sin veg. Ingen såg det, ingen merka det, og ingen vakna. Alle sov, for HERREN hadde late ein djup søvn koma over dei.

¹³Då David var komen over til den andre sida, stilte han seg opp på ein fjellknaus langt borte, slik at det var stor avstand mellom dei.

¹⁴Så ropa han til hæren og til Abner, son til Ner: «Skal du ikkje svara meg, Abner?» Abner svara: «Kven er du som ropar hit over til kongen?»

¹⁵David sa til Abner: «Er ikkje du ein mann? Og kven er som du i Israel? Kvifor har du då ikkje halde vakt over din herre, kongen? Ein av folket kom og ville drepa kongen, herren din.

¹⁶Det er ikkje bra, det du har gjort. Så sant HERREN lever, de fortener å døy alle saman fordi de ikkje har halde vakt over herren dykkar, over han som HERREN har salva. Sjå etter, kvar er kongens spyd og vasskrukke, som stod like ved hovudet hans?»

¹⁷Saul kjende att røysta til David og ropa: «Er ikkje dette di røyst, David, son min?» David svara: «Jau, det er mi røyst, herre konge.»

¹⁸Og han heldt fram: «Kvifor forfølgjer du tenaren din, herre? Kva har eg gjort? Kva vondt har eg gjort meg skuldig i?

¹⁹[77] Høyr no, herre konge, kva tenaren din seier: Er det HERREN som har hissa deg opp mot meg, så lat han få kjenna angen av offer. Men er det menneske, skal dei vera forbanna for HERRENS andlet. For no jagar dei meg bort så eg ikkje får bu i HERRENS eige land, og seier: Gå din veg og dyrk andre gudar!

²⁰Lat ikkje blodet mitt væta jorda langt borte frå HERRENS andlet. For Israels konge har drege ut og leitar etter ei loppe som når ein jagar rapphøner i fjellet.»

²¹Då sa Saul: «Eg har gjort urett. Kom tilbake, David, son min! Eg skal ikkje gjera deg noko vondt meir sidan du sette livet mitt så høgt i dag. Eg har bore meg uvitug åt og gjort ein stor feil.»

²²David svara: «Sjå, her er spydet til kongen! Lat ein av mennene koma over og henta det!

²³HERREN løner den som er rettferdig og trufast. Det var HERREN som gav deg i mine hender i dag, men eg ville ikkje leggja hand på den HERREN har salva.

²⁴Måtte HERREN setja mitt liv like høgt som eg har sett ditt liv i dag, og fria meg frå all naud.»

²⁵Då sa Saul til David: «Velsigna er du, David, son min. Mangt skal du gjera, og alt skal du lukkast i.» Så drog David sin veg, og Saul vende heim att.