Read nynorsk 2011 1. Samuelsbok 28 Bible Online

1. Samuelsbok 28 - nynorsk 2011 bible

1. Samuelsbok 28

¹På den tid samla filistrane hærane sine og ville gå til krig mot Israel. Då sa Akisj til David: «Du veit vel at både du og mennene dine må følgja meg i kamp?»

²David svara: «Godt, du skal få sjå kva tenaren din duger til.» Akisj sa: «Så set eg deg til sjef for livvakta mi for alltid.»

³No var Samuel død. Heile Israel hadde halde sørgjehøgtid over han, og dei hadde gravlagt han i Rama, heimbyen hans. Saul hadde drive ut av landet dei som mana fram daudingar og spådomsånder.

⁴Filistrane samla seg, drog til Sjunem og slo leir der. Saul samla heile Israel og slo leir på Gilboa-fjellet.

⁵Men då Saul såg filistarleiren, vart han så redd at hjartet hans skalv.

⁶[81] Han spurde HERREN til råds, men HERREN svara han ikkje, korkje i draumar eller ved urim eller gjennom profetar.

⁷[82] Då sa Saul til mennene sine: «Finn meg ei kvinne som kan mana fram gjenferd, så vil eg gå til henne og spørja henne til råds.» Mennene svara: «I En-Dor er det ei kvinne som kan mana fram gjenferd.»

⁸Saul gjorde seg no ukjenneleg og tok på seg andre klede. Han gjekk av stad saman med to mann, og dei kom til kvinna om natta. Saul sa til henne: «Kall fram ein av dei døde og spå meg! Hent opp den som eg nemner for deg.»

⁹Kvinna svara: «Du veit då sjølv kva Saul har gjort, at han har rydda ut alle i landet som manar fram daudingar og spådomsånder? Kvifor set du snarer for meg? Kvifor vil du drepa meg?»

¹⁰Då svor Saul henne ein eid ved HERREN og sa: «Så sant HERREN lever: Det skal ikkje koma skuld over deg for dette.»

¹¹Kvinna spurde: «Kven skal eg henta opp til deg?» Han svara: «Samuel.»

¹²Men då kvinna såg Samuel, sette ho i eit høgt skrik og sa til Saul: «Kvifor har du narra meg? Du er då Saul!»

¹³Men kongen sa til henne: «Ver ikkje redd! Kva er det du ser?» Kvinna svara: «Eg ser eit gudevesen stiga opp av jorda.»

¹⁴«Korleis ser det ut?» spurde Saul. Kvinna svara: «Ein gammal mann stig opp. Han er kledd i ei kappe.» Då skjøna Saul at det var Samuel, og han kasta seg ned med andletet mot jorda.

¹⁵Samuel sa til Saul: «Kvifor har du uroa meg og henta meg opp?» Saul svara: «Eg er i stor naud. Filistrane fører krig mot meg, og Gud har vendt seg frå meg. Han svarar meg ikkje lenger, korkje gjennom profetar eller i draumar. Difor har eg kalla på deg, så du skal la meg få vita kva eg skal gjera.»

¹⁶Då sa Samuel: «Kvifor spør du meg når HERREN har vendt seg frå deg og vorte fienden din?

¹⁷HERREN har gjort med deg slik som han sa gjennom meg. Han har rive kongedømet ut av handa di og gjeve det til ein annan, til David.

¹⁸Fordi du ikkje lydde HERREN og ikkje fullførte vreidedommen hans over amalekittane, difor har HERREN no gjort dette mot deg.

¹⁹HERREN vil gje både deg og Israel i filistarhand. I morgon skal du og sønene dine vera hos meg. Og HERREN skal gje Israels-hæren òg i filistarhand.»

²⁰Med det same Saul høyrde det Samuel sa, kom det slik redsle over han at han fall til jorda så lang han var. Han var heilt kraftlaus, for han hadde ikkje smaka mat heile dagen og heile natta.

²¹Kvinna kom bort til Saul. Og då ho såg kor redd han var, sa ho til han: «Tenestekvinna di har lydd deg. Eg våga livet og gjorde som du sa til meg.

²²Så høyr no du òg på tenestekvinna di og lat meg få setja fram litt mat for deg. Et, så du kan koma til krefter før du dreg din veg.»

²³Men han nekta og sa: «Eg vil ikkje ha mat.» Men då både mennene hans og kvinna nøydde han, gjorde han som dei sa. Han reiste seg opp frå jorda og sette seg på senga.

²⁴Kvinna hadde ein gjøkalv heime, og den skunda ho seg å slakta. Så tok ho mjøl, knadde det og baka usyra brød.

²⁵Ho bar maten fram for Saul og mennene hans, og dei åt. Same natta braut dei opp og drog sin veg.