Read nynorsk 2011 1. Samuelsbok 31 Bible Online

1. Samuelsbok 31 - nynorsk 2011 bible

1. Samuelsbok 31

¹Filistrane førte krig mot Israel. Då flykta israelittane for dei, og det låg mange falne på Gilboa-fjellet.

²Filistrane var like i hælane på Saul og sønene hans, og dei felte Jonatan, Abinadab og Malkisjua, sønene til Saul.

³Saul var hardt pressa i kampen. Bogeskyttarane kom over han, og han skalv av redsle for dei.

⁴Då sa Saul til våpenberaren sin: «Dra sverdet og støyt det gjennom meg, så ikkje desse uomskorne skal koma og stikka meg ned og fara ille med meg.» Men våpenberaren ville ikkje; han var for redd. Då tok Saul sjølv sverdet og styrta seg mot det.

⁵Då våpenberaren såg at Saul var død, styrta han seg mot sverdet sitt og følgde Saul i døden.

⁶Den dagen fall Saul og dei tre sønene hans, våpenberaren og alle Sauls menn.

⁷Då dei israelittane som budde på den andre sida av dalen og av Jordan, såg at Israels soldatar hadde flykta, og at Saul og sønene hans var falne, tok dei ut frå byane sine og flykta. Og filistrane kom og slo seg ned der.

⁸Dagen etter kom filistrane og ville plyndra dei døde. Då fann dei Saul og dei tre sønene hans som låg falne på Gilboa-fjellet.

⁹Dei hogg hovudet av Saul og tok våpna hans. Så sende dei bod rundt om i filistarlandet for å ropa ut sigersbodskapen for folket og ved templa der gudebileta stod.

¹⁰Våpna hans la dei ned i Astarte-tempelet, og kroppen hengde dei opp på muren i Bet-Sjean.

¹¹Då innbyggjarane i Jabesj i Gilead fekk høyra kva filistrane hadde gjort med Saul,

¹²braut alle våpenføre menn opp og gjekk heile natta. Dei tok kroppane til Saul og sønene hans ned frå muren i Bet-Sjean. Då dei kom til Jabesj, brende dei kroppane der.

¹³Dei tok knoklane deira og gravla dei under tamarisken i Jabesj. Så fasta dei i sju dagar.