Read nynorsk 2011 1. Samuelsbok 8 Bible Online

1. Samuelsbok 8 - nynorsk 2011 bible

1. Samuelsbok 8

¹Då Samuel vart gammal, sette han sønene sine til dommarar i Israel.

²Den førstefødde heitte Joel og den andre Abia. Dei var dommarar i Beer-Sjeba.

³Men sønene følgde ikkje vegane til Samuel. Dei søkte urett vinning, lét seg kjøpa og vrengde retten.

⁴Då samla alle dei eldste i Israel seg og kom til Samuel i Rama.

⁵Dei sa til han: «No er du gammal, og sønene dine følgjer ikkje dine vegar. Set ein konge til å styra oss slik alle dei andre folka har.»

⁶Men Samuel såg med uvilje på dette at dei sa: «Gjev oss ein konge som kan styra oss!» Og han bad til HERREN.

⁷Men HERREN sa til han: «Høyr på folket og alt dei seier til deg! For det er ikkje deg dei har vraka; det er meg dei har vraka og ikkje vil ha til konge over seg.

⁸Det har dei gjort frå den dagen eg førte dei opp frå Egypt og til denne dag. Dei har gått ifrå meg og dyrka andre gudar. Og slik gjer dei no mot deg.

⁹Så høyr på dei! Men åtvara dei og fortel kva rettar kongen deira kjem til å få.»

¹⁰Samuel fortalde folket som kravde ein konge av han, alt det HERREN hadde sagt.

¹¹Han sa: «Dette er rettane til kongen som skal herska over dykk: Han tek sønene dykkar og set dei til å gjera teneste ved kongens vogner og hestar og til å springa framfor vogna hans.

¹²Nokre set han til førarar for tusen mann og nokre for femti. Nokre må pløya åkrane og hausta inn avlinga hans, andre må laga krigsvåpen og utstyr til stridsvognene.

¹³Døtrene dykkar set han til å laga salvar, til å koka og baka.

¹⁴Dei beste jordstykka, vinmarkene og olivenlundane dykkar skal han ta og gje til mennene sine.

¹⁵Av åkrane og vinmarkene dykkar skal han ta tiend og gje til hoffmennene og tenarane sine.

¹⁶[26] Slavane og slavekvinnene, esla og dei beste oksane dykkar tek han i si eiga teneste.

¹⁷Av småfeet dykkar tek han tiend, og sjølve må de gjera slavearbeid for han.

¹⁸Når den dagen kjem, skal de skrika høgt over kongen de valde. HERREN skal ikkje svara dykk den dagen.»

¹⁹Men folket nekta å høyra på Samuel. «Nei», sa dei, «vi vil ha ein konge over oss.

²⁰Vi vil vera som dei andre folka. Kongen vår skal styra oss; han skal rykkja ut framfor oss og føra krigane våre.»

²¹Då Samuel hadde høyrt alt det folket sa, la han det fram for HERREN.

²²Og HERREN sa til Samuel: «Høyr på det dei seier og set ein konge over dei.» Då sa Samuel til israelittane: «Gå heim att, kvar til sin by!»