Read obolo Ibeb 1 Bible Online

Ibeb 1 - obolo bible

Ibeb 1

¹Me ibebene, Awaji îrom isinyọn̄ mè linyọn̄.

²Ire, linyọn̄ ya ìkabet lek inu geege, ìkpọkpọ ilaak ukpọk. Mun̄ mun̄ ojot linyọn̄. Udun okakana otutuuk ere ichit bùk. Ekwukwu Awaji okekiwulu efe igba iyak ikana me inyọn̄ isi mun̄.

³Awaji onenitumu ibe, “Utoon̄ ikup!” Utoon̄ okukup.

⁴Awaji omumun̄ ibe ke utoon̄ ya îjaan̄, mè iniche utoon̄ ya isan̄a me lek udun ya,

⁵mè igwen utoon̄ ya egwe, mè inigwen udun ya eririeen̄. Eririeen̄ okukup, egwe okukup. Eya orere adasi usen.

⁶Awaji onenitumu ibe, “Ofok ikup me eden̄ mun̄, mè iche mun̄ ya irek iba! Irek ge ikup me inyọn̄, mè irek ge ikup me irak!”

⁷Ikeya ke Awaji orom ofok ya, mè iche mun̄ eyi òkup me irak ofok ya isan̄a me lek eyi òkup me inyọn̄ ofok ya. Ikukup ikeya.

⁸Awaji onenigwen ofok ya akpabin. Eririeen̄ okukup, egwe okukup. Eya orere òso usen iba.

⁹Awaji onenitumu ibe, “Mun̄ òkup me agan̄ irak akpabin ikwọọk igba ititiin̄ me agan̄ ge, inyi nchat ijọn̄ isibi ikeke!” Ikukup ikeya.

¹⁰Awaji ogwegwen nchat ijọn̄ ya ijọn̄, mè igwen èdọ mun̄ ya okwaan̄. Awaji okpọkpọ, mè imun̄ ibe ke inu cha îjaan̄.

¹¹Awaji onenitumu ibe, “Chieen̄ inwan̄ oron geelek, mè uti òkito mfut òkaan̄ ukwuuk me emen, melek echi òkito mfut ibot ibot itibi isibi me ijọn̄, mè ikito mfut igọọk me chieen̄ kiban̄!” Ikukup ikeya.

¹²Inwan̄ oron mè esese uti geelek echi òkito mfut ukwuuk okikup me emen, mè echi òkito mfut ibot ibot obebene ikitibi isibi me ijọn̄, mè ikito mfut kiban̄ esese esese igọọk me chieen̄ kiban̄. Awaji okpọkpọ, mè imun̄ ibe ke inu cha îjaan̄.

¹³Eririeen̄ okukup, egwe okukup. Eya orere òso usen ita.

¹⁴Awaji onenitumu ibe, “Inu echi òkinyi utoon̄ ikup me akpabin inyọn̄, mè iche egwe isun̄ esese esan̄a me lek eririeen̄, inyi ekesa ema eriọọn̄ ibot mgbọ, mè ekesa efuk egwe, mè acha,

¹⁵mè ema ekup me akpabin inyọn̄ ekenyi utoon̄ me linyọn̄!” Ikukup ikeya.

¹⁶Sa me ikeyi ke Awaji orom ikpele inu iba òkinyi utoon̄. Ura, òrere eyi ilile ke îsun̄ ibe ikinyi utoon̄ me ikarek. Sà onyan̄, òrere eyi sọntiik ke îsun̄ ibe ikinyi utoon̄ me eririeen̄. Awaji îrom ebi kè ntoronyan̄ si.

¹⁷Awaji onenisun̄ ura mè onyan̄ mè ebi kè ntoronyan̄ cha me akpabin inyọn̄ ibe ekenyi utoon̄ me linyọn̄,

¹⁸mè ekekpulu me egwe mè eririeen̄, inyi ekeche utoon̄ esan̄a me lek udun. Awaji okpọkpọ, mè imun̄ ibe ke inu cha îjaan̄.

¹⁹Eririeen̄ okukup, egwe okukup. Eya orere òso usen ini.

²⁰Awaji onenitumu ibe, “Esese chieen̄ inu geelek òkifuuk efuuk ugwem igwook ichit emen mun̄, mè esese chieen̄ unọn òwulu me inyọn̄ ikiwulu ikana me linyọn̄ me irak akpabin inyọn̄!”

²¹Sa me ikeyi ke Awaji orom esese chieen̄ ikpele anam mun̄ geelek mè inu geelek òkifuuk efuuk ugwem echi òjojot okwaan̄, mè ikije ikana emen mun̄, mè irom si kpa chieen̄ kpa chieen̄ unọn geelek òkaan̄ uwop. Awaji okpọkpọ, mè imun̄ ibe ke inu cha îjaan̄.

²²Awaji onenigbana ema ibe, “Ìmumana, mè ìwa me otu ifuk, mè ìjot okwaan̄. Enyi ebi kè unọn, ìmumana ìjot linyọn̄.”

²³Eririeen̄ okukup, egwe okukup. Eya orere òso usen go.

²⁴Awaji onenitumu ibe, “Esese chieen̄ anam geelek ijot linyọn̄, ebi kè anam uwu mè anam oron, mè inu geelek òkinyinyọnọ me ijọn̄ me kpa chieen̄ kpa chieen̄ kiban̄!” Ikukup ikeya.

²⁵Sa me ikeyi ke Awaji orom esese chieen̄ anam geelek me linyọn̄, mè irom si inu geelek òkinyinyọnọ ikana me ijọn̄, geelek mè kpa chieen̄ kan̄. Awaji okpọkpọ, mè imun̄ ibe ke inu cha îjaan̄.

²⁶Me mgbọ Awaji orombe otutuuk inu chi isan̄a kpai, inenitumu ibe, “Eji enerom ebilene me mbet kiji, mè ema ekup kubọk kiji, mè ekekpulu irin̄ òkup me okwaan̄, mè unọn òwulu me inyọn̄, mè otutuuk anam geelek òkup me linyọn̄, mè otutuuk inu geelek òkinyinyọnọ ikana me ijọn̄, mè ekekpulu otutuuk linyọn̄.”

²⁷Sa me ikeya ke Awaji orom ene me mbet kan̄. Ìrom ene me mbet Awaji. Ìrom ema enerieen̄ mè enenwaan̄.

²⁸Awaji onenigbana ema ibe, “Ìmumana, mè ìwa me otu ifuk, mè ìjot linyọn̄, mè ìkikpulu linyọn̄! Ìkikpulu ebi kè irin̄ òkup me mun̄, mè unọn òwulu me inyọn̄, mè otutuuk inu geelek òkifuuk efuuk mè ikije ikana me inyọn̄ ijọn̄.”

²⁹Awaji onenitumu inyi ebilene cha ibe, “Ìkpọ, nra inyi enyi otutuuk inu geelek òkitibi me oron mè ikito mfut me otutuuk linyọn̄, mè otutuuk uti geelek òkito mfut òkaan̄ ukwuuk me emen, ibe ire inorie inyi enyi.

³⁰Nsa si otutuuk inwan̄ oron geelek inyi otutuuk anam òkup me linyọn̄, mè otutuuk unọn òwulu me inyọn̄, mè otutuuk inu geelek òkinyinyọnọ me ijọn̄, mè otutuuk inu geelek òkifuuk efuuk ugwem, ibe ire inorie inyi ema.” Ikukup ikeya.

³¹Awaji onenikpọ otutuuk inu geelek îrombe, mè imun̄ ibe ke îjaan̄ enenen. Eririeen̄ okukup, egwe okukup. Eya orere òso usen gweregwen.