Read obolo Ibeb 11 Bible Online

Ibeb 11 - obolo bible

Ibeb 11

¹Me ike mgbọ ya, otutuuk linyọn̄ ekaan̄ otu usem ge gaalek, mè ikitumu ida amọn yaage.

²Ebilene enenibene ije ikije inyi agan̄ mbum-ura, mè isi imun̄ òla ijọn̄ ge me inyọn̄ ijọn̄ Babilonia, mè iniluk me ere ya.

³Ema enenitọt me lek kiban̄ ibe, “Ngwa, eji enebot okpungwu, mè ewọp me ukan̄, inyi inye ijaan̄ lek.” Ema enenisa okpungwu cha irọ ewuuk inama-uwu, mè isa ulobo ulobo agba ofifit ichọkọ ewuuk cha igba igọm.

⁴Ema enenitumu ibe, “Ngwa, eji enenama ikpele ama ge enyi lek kiji, mè enama si ikpele uwu-oket eyi inyọn̄ kan̄ môbenebe isi ichak me isinyọn̄, inyi eji esa me ikeya etaan̄ etip, mè eji ekayiyala ìkana otutuuk linyọn̄.”

⁵Okumugwem osisibi inu inikpọ ama ya mè uwu-oket eyi ebilene ekinama,

⁶mè ibe, “Eyi ebi ife chi erebe ge, mè ikaan̄ otu usem ge, mè ibene ikirọ inu yi, kpunu inu geege eyi ema etọtbe irọrọ eyi òboyọt ema me lek.

⁷Eya orọ, eji enesibi esi ewuwọlọ usem kiban̄, inyi ge ikayaka ìnọ inu ogwu melek kan̄ okitumu.”

⁸Sa me ikeya ke Okumugwem oyiyala ebi ife cha ikana otutuuk linyọn̄. Ema kpeyaka ikọt inama ama ya igak ikeya.

⁹Eya orọ egwenbe ama ya Baben,[23] mije, îre me ere ya ke Okumugwem owuwọlọ otu usem otutuuk linyọn̄, mè iyiyala ebilene ikana otutuuk linyọn̄.

¹⁰Mfufuk owot iman kè Sem ìkup ikeyi: Mgbọ acha iba orakabe me lek mun̄ ile ya, Sem obobon Afakisadi. Acha ya si ore òso efit acha me ugwem kè Sem.

¹¹Mgbọ Sem obonbe Afakisadi iraka, iluluk si efit acha go, mè ibon ofifi bọn ebirieen̄ mè ebibaan̄ me etete mgbọ ya.

¹²Mgbọ Afakisadi osobe akọp acha ita mè go, inenibon Siela.

¹³Mgbọ îbonbe Siela iraka, iluluk si efit acha ini mè ita, mè ibon ofifi bọn ebirieen̄ mè ebibaan̄ me etete mgbọ ya.

¹⁴Mgbọ Siela osobe akọp acha ita, inenibon Eberi.

¹⁵Mgbọ îbonbe Eberi iraka, iluluk si efit acha ini mè ita, mè ibon si ofifi bọn ebirieen̄ mè ebibaan̄ me etete mgbọ ya.

¹⁶Mgbọ Eberi osobe akọp acha ita mè ini, inenibon Pelegi.

¹⁷Mgbọ îbonbe Pelegi iraka, iluluk si efit acha ini mè akọp ita, mè ibon si owuwa bọn ebirieen̄ mè ebibaan̄ me etete mgbọ ya.

¹⁸Mgbọ Pelegi osobe akọp acha ita, inenibon Rewu.

¹⁹Mgbọ îbonbe Rewu iraka, iluluk efit acha iba mè onaan̄ge, mè ibon si ofifi bọn ebirieen̄ mè ebibaan̄ me etete mgbọ ya.

²⁰Mgbọ Rewu osobe akọp acha ita mè iba, inenibon Serugu.

²¹Mgbọ îbonbe Serugu iraka, iluluk efit acha iba mè jaaba, mè ibon si ofifi bọn ebirieen̄ mè ebibaan̄ me etete mgbọ ya.

²²Mgbọ Serugu osobe akọp acha ita, inenibon Nayọ.

²³Mgbọ îbonbe Nayọ iraka, iluluk si efit acha iba, mè ibon ofifi bọn ebirieen̄ mè ebibaan̄ me etete mgbọ ya.

²⁴Mgbọ Nayọ osobe akọp acha iba mè onaan̄ge, inenibon Tera.

²⁵Mgbọ îbonbe Tera iraka, iluluk si efit acha mè akọp mè onaan̄ge, mè ibon si ofifi bọn ebirieen̄ mè ebibaan̄ me etete mgbọ ya.

²⁶Mgbọ Tera osobe akọp acha jaaba, inenibon Eberam, mè Nayọ, mè Aran.

²⁷Mfufuk egep kè Tera ìje ikeyi: Tera obon Eberam, mè Nayọ mè Aran. Aran onenibon Lọt.

²⁸Aran onenikwu itele Tera ogwu ute me ama emanbe ọmọ, eyi òrere ama Uru, òkup me ido Kalidia.

²⁹Eberam mè Nayọ enenido nwa. Erieen̄ nwa kè Eberam ìre Serayi. Erieen̄ nwa kè Nayọ ore Milika, gwun̄ kè Aran. Aran ore nte kè Milika mè Isika.

³⁰Ire, Serayi ìre òra, ìkaman gwun̄ geege.

³¹Tera onenikpulu Eberam ogwu gwun̄, mè Lọt gwun̄ ogwu gwun̄ Aran, mè Serayi nwa kè Eberam ogwu gwun̄, mè isa ema inan̄a me Uru òkup me ido Kalidia ije ibosi ido Kenan. Me oniin̄ kiban̄, ema ejeje inire ama ekigwen Aran, mè iluk me ama ya.

³²Tera okwukwu me Aran. Otutuuk otu ifuk acha kan̄ ìre efit acha iba mè go.