Read obolo Ibeb 13 Bible Online

Ibeb 13 - obolo bible

Ibeb 13

¹Eberam oneninan̄a me Ijipiti isibi, ọmọ mè Serayi ogwu nwa, mè Lọt, mè ikpulu otutuuk inu îkaan̄be igbaalek isa inan̄a ije ifo èwê agan̄ osiki.

²Me ike mgbọ ya, Eberam îkana ogwu òbọbọọn̄ ubọọn̄ enenen, mije esese chieen̄ anam, mè alata okuket, mè alata araran̄ îkaan̄be.

³Eberam oneninan̄a me èwê agan̄ osiki ya ijijen̄e ikana ikifo Beten, mè inire ere îgwuun̄be uwu ọfọ kan̄ me adasi mgbọ ya, me etete Beten mè Ai,

⁴òrere ere înamabe ntook me adasi mgbọ ya. Mgbọ îjebe inire ere ya, itọtọbọ ebum inyi Okumugwem.

⁵Lọt, ogwu melek kan̄ ekijijen̄e ikana, îkaan̄ si owuwa arọọn̄ mè eriembuuk, mè ikaan̄ si owuwa ebi ene ebi ìgọgọọk ọmọ ije.

⁶Ire, inyọn̄ ijọn̄ ya ema elukbe ìkayaka ìta ema igbagbaan̄ iluk, mije, anam kiban̄ mè ogbogbo inu ema ekaan̄be îwa enenen. Eya orọ, ema kpeyaka ikọt igbaan̄ iluk.

⁷Mije keya, gọlọgọlọ oninin̄ me etete ebi ìkikpukpo anam kè Eberam melek ebi ìkikpukpo anam kè Lọt. Ebi Kenan mè ebi Pereji mîluk si me inyọn̄ ijọn̄ ya me ike mgbọ ya.

⁸Mije keya, Eberam onenitumu inyi Lọt ibe, “Ìkanwọn ibe ibaak geege ikup me etete kwun̄ melek n̄a, mè etete ebi ìkikpukpo anam n̄a melek ebi ìkikpukpo anam kwun̄, mije, eji ìre ngwan̄ ngwan̄.

⁹Kpọ, ijọn̄ ijọn̄ ire echi òkakana eji okokop! Ngwa, eji eneche lek kiji, mè ge ida lek ibọkọ me lek ge. Owu kpọ agan̄ òneme owu gobo. Ire owu ogobo agan̄ ujit, emi mâmọnọ agan̄ ulom. Ire owu ogobo agan̄ ulom emi mâmọnọ agan̄ ujit.”

¹⁰Lọt obebene chieen̄ ikpọ, mè imun̄ ibe ke bene me iteke ijọn̄ agba okwaan̄ Jodan si gwook me Sowari îjaan̄ ijọn̄ enenen, mè ikup nrek nrek, mè ikitibi inu ijaan̄ kubọk uko Okumugwem owopbe me Iden, mè ijaan̄ si kubọk ijọn̄ Ijipiti. (Inu yi îrọ isan̄a sabum Okumugwem onichep Sodọm mè Gomora.)

¹¹Lọt onenigobo otutuuk iteke ijọn̄ agba okwaan̄ Jodan inyi lek kan̄, mè inan̄a ije ifo agan̄ mbum-ura ere ijọn̄ ya okupbe. Ikeyi ke Eberam mè Lọt esa iche lek kiban̄.

¹²Eberam oluk me ido Kenan. Lọt oluluk me etete ama òkup me iteke ijọn̄ agba okwaan̄ Jodan, mè isa uwu ọfọ kan̄ ije ijọn̄ọ ere ifo agba lek Sodọm isi igwuun̄.

¹³Me ike mgbọ ya, ebi ama Sodọm mîwa ikpak me lek, mè ikirọ Okumugwem ijo inu enenen.

¹⁴Mgbọ Lọt otelebe Eberam, Okumugwem onenitumu inyi Eberam ibe, “Me ere ya okupbe, bene chieen̄ kwun̄ kpọ agan̄ inyọn̄, mè osiki, mè agan̄ mbum-ura, mè ichep-ura.

¹⁵Îre owu melek owot iman kwun̄ ke mbasa otutuuk ijọn̄ chi geelek omun̄be inyi, inyi ire eyi kwun̄ ire mgbọ geelek.

¹⁶Mârọ inyi owot iman kwun̄ imumana, mè iwa kubọk nkwukwuuk mfuun̄ ijọn̄. Ire ene ikọt ifuk otu ifuk nkwukwuuk mfuun̄ ijọn̄, ikeya si, mêkọt ifuk otu ifuk bọn owot iman kwun̄.

¹⁷Mgbọ yi, nan̄a keke, mè je kana kpọ ujọn̄ọ ijọn̄ yi, mè uwele kan̄. Îre owu ke mbasa otutuuk inyi.”

¹⁸Eberam oneninan̄a me ere ya ije isi iluk me ama Eburọn, me agba lek ilip mbuban echi kè Mamire, mè inama ntook inyi Okumugwem me ere ya.