Read obolo Ibeb 14 Bible Online

Ibeb 14 - obolo bible

Ibeb 14

¹Me ike mgbọ ya, Amirafen ore ogwu ubọọn̄ me Babilonia, Ariọk ore ogwu ubọọn̄ me Elasa, Kedolawoma ore ogwu ubọọn̄ me Elam, Tidan ore ogwu ubọọn̄ me Goyim.

²Ebi ubọọn̄ ini chi enenibene akọn̄ me lek kè Bera ogwu ubọọn̄ Sodọm, mè Berisa ogwu ubọọn̄ Gomora, mè Sinabu ogwu ubọọn̄ Adima, mè Semeba ogwu ubọọn̄ Seboyim, mè ogwu ubọọn̄ ama Bela. Bela ke ekigwen Sowari.

³Otutuuk ebi ubọọn̄ go chi enenititiin̄ lek kiban̄ me iteke ijọn̄ Sidim, eyi òrere okwaan̄ Uchi.

⁴Ebi ubọọn̄ go chi mîkup me irak kè Kedolawoma ogwu ubọọn̄ Elam, mè ikisi ikwaan̄ inyi ogwu ubọọn̄ yi akọp mè acha iba. Òso akọp mè acha ita, ema ebebene ikikpaka ibot.

⁵Me òso akọp mè acha ini, Kedolawoma melek ebi ubọọn̄ ebi melek kan̄ erebe otu ge enenisi itim akọn̄ ikpan̄ ebi Refa me Asiterot Karanayim, mè itim ikpan̄ ebi Juji me Am, mè itim ikpan̄ ebi Eyim me Sabe Kiriatayim,

⁶mè itim ikpan̄ ebi Ori me inyọn̄ ogoon̄ òkup me Seya, mè ilap ema isi ire ama ekigwen Eli Paran me agba lek èwê,

⁷mè inigwu ikom isi En Misipat, eyi òrere Kades, mè itim ikpan̄ otutuuk ido ebi Amalek, mè ebi Amọ ebi ìluk me Asasọn Tema.

⁸Mgbọ ya ke ebi ubọọn̄ ebi ama Sodọm mè Gomora mè Adima, mè Seboyim, mè Bela eyi òrere Sowari, enijibi akọn̄ isi iteke ijọn̄ Sidim isi ichichini melek ebi ubọọn̄ ini cha.

⁹Ebi ubọọn̄ ini cha ìre Kedolawoma ogwu ubọọn̄ Elam, mè Tidan ogwu ubọọn̄ Goyim, mè Amirafen ogwu ubọọn̄ Babilonia, mè Ariọk ogwu ubọọn̄ Elasa. Ebi ubọọn̄ ini chi egbaan̄ itim akọn̄ me lek ebi ubọọn̄ go cha.

¹⁰Me iteke ijọn̄ Sidim ere ema ekitim akọn̄ ya, udọn̄ erọkọbe agba ofifit me emen ìkpọkpọ ijot. Mgbọ ebi ubọọn̄ Sodọm mè Gomora ekilibi inan̄a me isi akọn̄ ya, ema erururọn̄ọ inwaan̄ me emen udọn̄ cha. Ebi melek kiban̄ elililiin̄ ifon inyọn̄ ogoon̄, mè inwọnọ.

¹¹Ebi ubọọn̄ ini cha ekpukpulu otutuuk inorie mè inu geelek ema emun̄be me ama Sodọm mè ama Gomora, mè isa ifon,

¹²mè itet si Lọt gwun̄ ngwan̄ kè Eberam, ogwu òluk me Sodọm, mè ikpulu otutuuk inu îkaan̄be, isa igbaalek ifo.

¹³Ene ge me lek ebi ìlilibi inwọnọ akọn̄ ya onenisi ikpa otutuuk inu chi òrọrọ inyi Eberam ogwu Iburu. Me mgbọ ya, Eberam ìluk me agba lek ilip mbuban kè Mamire ogwu Amọ. Mamire ìre ngwan̄ kè Esikon mè Aneri, ebi melek Eberam egbaan̄be inyan̄a ibot unene mè unene.

¹⁴Mgbọ Eberam onọbe ibe ke mîtet Lọt gwun̄ ngwan̄ kan̄ me akọn̄, itititiin̄ ebi akọn̄ kan̄, efit ene ita mè akọp mè jeeta ebi îkpukpobe isibi, ebi emanbe me uwu kan̄, mè ijibi akọn̄ igọọk ebi ubọọn̄ cha ìtetet gwun̄ ngwan̄ kan̄, mè isi isoon̄ ema me Dan.

¹⁵Eberam melek ebi akọn̄ kan̄ eneniche lek kiban̄ me eririeen̄ ya, mè itim akọn̄ me lek ebi ubọọn̄ cha, mè ililaba ema isi igwook me Oba eyi òkup me iraraka Damasikọs ifo agan̄ inyọn̄,

¹⁶mè ibọkọ Lọt gwun̄ ogwu ngwan̄, mè otutuuk inu kan̄ geelek, mè ibọkọ si ebibaan̄, mè ebi geelek, mè otutuuk inu geelek ebi ubọọn̄ cha ekpulube me akọn̄ ya.

¹⁷Mgbọ Eberam otimbe ikpan̄ Kedolawoma ogwu ubọọn̄ Elam mè ebi melek kan̄, mè ikije ika, ogwu ubọọn̄ Sodọm onenije isi ikweek ọmọ me iteke ijọn̄ Safe, eyi òrere iteke ijọn̄ ogwu ubọọn̄.

¹⁸Melikisedek, ogwu ubọọn̄ Salem,[24] onanan̄a isibi inichichini Eberam, mè isan̄a inorie mè miin̄ isibi inyi Eberam mè ebi melek kan̄. Ọmọ ìre ogwu ngwugwa Awaji Ogwu Òbebene Ichit.

¹⁹Melikisedek onenigbana Eberam mè ibe, “Awaji Ogwu Òbebene Ichit, ogwu òrom inyọn̄ mè ijọn̄, igbana owu Eberam.

²⁰Itọn̄ ikup inyi Awaji Ogwu Òbebene Ichit, ogwu òkakana ebi ochicha kwun̄ itap owu me ubọk.” Eberam oneniche otutuuk inu îkpulube me akọn̄ akọp irek, mè inisa irek ge inyi Melikisedek.

²¹Ogwu ubọọn̄ Sodọm onenibeek Eberam ibe inyi ọmọ ebi kan̄, mè ikpulu inu kiban̄ geelek îbọkọbe me akọn̄ ya isak.

²²Eberam ofọfọọk ogwu ubọọn̄ Sodọm ibe, “Mbene ubọk n̄a ifo inyọn̄ inyi Okumugwem, Awaji Ogwu Òbebene Ichit, ogwu òrom inyọn̄ mè ijọn̄, mè isa erieen̄ kan̄ inyan̄a ibot ibe,

²³ke emi m̀kpabọkọ inu geege òrere eyi kwun̄, bene me lek eri re lek olik ikpukot, inyi owu okatumu ibe ke îre owu orọ inyi emi m̀bọọn̄ ubọọn̄.

²⁴Emi me lek n̄a ǹkaweek inu geege, ilọ me lek inorie echi ebi akọn̄ n̄a ewuukbe lek irie, mè uche inu òrere lek ebi unene n̄a ìgọgọọk emi isi akọn̄, ìrere Aneri mè Esikon mè Mamire. Ebiba mêbọkọ uche inu eyi kiban̄.”