Read obolo Ibeb 2 Bible Online

Ibeb 2 - obolo bible

Ibeb 2

¹Ikeyi ke Awaji osa irom inyọn̄ mè ijọn̄ mè urum inu geelek òkup me emen kiban̄ isan̄a.

²Me òso usen jaaba, Awaji îwuuk lek isi ikwaan̄ kan̄ otutuuk isan̄a kpai. Awaji osisiki efuuk me òso usen jaaba ya, ìkasi ikwaan̄ geege usen ya.

³Awaji ogbagbana òso usen jaaba, mè isun̄ usen ya me mbuban, mije, îre me usen ya ke îsiki efuuk mgbọ îrombe otutuuk inu isan̄a.

⁴Mfufuk ubọk Awaji osabe irom inyọn̄ mè ijọn̄ ìje ikeyi: Mgbọ Okumugwem Awaji orombe inyọn̄ mè ijọn̄,

⁵mbubet mè uti òkup me oron geege ìkatibi ìsibi-nu me inyọn̄ ijọn̄, mije, Okumugwem Awaji ìkaria-nu ibot mè mbat ìgwook me linyọn̄. Mgbọ ya si, kpunu ene geege òkirọkọ ijọn̄ iwop mfut.

⁶Àbaan̄ ibot okekinan̄a me irak ijọn̄ isibi, mè inikireke otutuuk inyọn̄ ijọn̄.

⁷Okumugwem Awaji onenisa mfuun̄ ijọn̄ irom enerieen̄,[1] mè ifuuk efuuk ugwem itap me udọn̄ inwọm iba kan̄, ogwu enerieen̄ ya okakana ogwu òkiluluk ugwem.

⁸Okumugwem Awaji îwop uko ge me agan̄ mbum-ura me ere ekigwen Iden. Emen uko ya ke îtap ogwu enerieen̄ ya îrombe.

⁹Okumugwem Awaji orọrọ mè owuwa ujuja uti òkup esese esese mè ikito esese chieen̄ mfut ònwọnwọn irerie, itibi isibi me ijọn̄ me emen uko ya. Me eden̄ uko ya si, uti òkinyi ene ugwem melek uti òkirọ inyi ene iriọọn̄ ata inu mè ijo inu òwa okekebe.

¹⁰Îkaan̄ okwaan̄ ge òkup me Iden, eyi mun̄ kan̄ okilibi inireke uko ya. Okwaan̄ yi isisibi me Iden, ibubum ikana okwaan̄ ini.

¹¹Adasi me lek okwaan̄ ini cha, eyi ekigwen Pisọn, ìje kọnọkọnọkọnọ itibi otutuuk inyọn̄ ijọn̄ ekigwen Abila, ere alata araran̄ okupbe.

¹²Alata araran̄ òkup me inyọn̄ ijọn̄ ya ìre eyi atata kan̄. Mgbe utop olu ekigwen bideliọm, mè ewuuk unye otu ewe ekigwen onikisi òwa si me irak ijọn̄ ya.

¹³Okwaan̄ eyi òso iba eyi ekigwen Giyọn ìkukọnọ itibi otutuuk inyọn̄ ijọn̄ ekigwen Kus.[2]

¹⁴Okwaan̄ eyi òso ita eyi ekigwen Tigiris[3] ìje itibi me agan̄ mbum-ura eyi ama Asuru.[4] Okwaan̄ eyi òso ini ke ekigwen Yuferetis.

¹⁵Okumugwem Awaji osasa enerieen̄ ya isi itap me emen uko Iden ibe ikisi ikwaan̄ me emen, mè ikikpọ chieen̄ me lek.

¹⁶Okumugwem Awaji onyinyi ogwu enerieen̄ ya ikan ibe, “Owu môkọt irie mfut uti geelek òkup me emen uko yi.

¹⁷Ire, mfut ònan̄a me lek uti eyi òkirọ inyi ene iriọọn̄ ata inu mè ijo inu, karie. Mije, mgbọ geelek owu môriebe mfut uti ya, owu òkpolọlọ ikwukwu.”

¹⁸Mgbọ eya orakabe, Okumugwem Awaji onenitumu ibe, “Ìkanwọn ibe ogwu enerieen̄ yi ikup ọmọ gaalek. Mârom ogwu ntap-ubọk ògbegbe inyi.”

¹⁹Okumugwem Awaji ìsa ntitaak ijọn̄ irom esese chieen̄ anam geelek mè unọn geelek. Inenisa ema otutuuk inu me lek ogwu enerieen̄ ya òrere Adam ibe inyi erieen̄. Erieen̄ geelek Adam onyibe anam geelek mè ofut geelek, eya ore erieen̄ keya.

²⁰Ikeya ke enerieen̄ ya osa inyi otutuuk anam uwu geelek, mè otutuuk anam oron geelek, mè otutuuk unọn geelek erieen̄ iso. Ire, me etete anam chi mè unọn chi, kpunu geege ògbegbe irere ogwu ntap-ubọk inyi ogwu enerieen̄ ya.

²¹Mije keya, Okumugwem Awaji orọrọ inyi uga ilaak ikeme ogwu enerieen̄ ya. Me mgbọ îkilaak, Okumugwem Awaji osasan̄a mgbaramgbasi kan̄ ge, mè isa ufuk ichit agba nkan̄ kan̄ ere îsan̄abe mgbaramgbasi ya.

²²Inenisa mgbaramgbasi ya îsan̄abe me lek ogwu enerieen̄ ya irom enenwaan̄, mè inisa ogwu enenwaan̄ ya ijet ogwu enerieen̄ ya.

²³Ogwu enerieen̄ ya obebe, “Chei, me mgbọ keyi, ogwugwu ìre ukwuuk ònan̄a me lek ukwuuk n̄a, mè ufuk ònan̄a me lek ufuk n̄a. Mêkigwen ọmọ enenwaan̄, mije, esan̄a ọmọ me lek enerieen̄ isibi.”

²⁴Mije keyi, enerieen̄ geelek môtele ogwu ute mè ogwu uga, mè isa lek kan̄ ichim iriaak me lek ogwu nwa. Ema ene iba mênenikana ire akpalek ge.

²⁵Ogwu enerieen̄ ya mè ogwu nwa ekup njak. Ire, esip geege ìkatet ema.