Read obolo Ibeb 21 Bible Online

Ibeb 21 - obolo bible

Ibeb 21

¹Mgbọ mgbọ okembe, Okumugwem onenikaan̄ ejit nsan me lek kè Sera, mè irọ use kan̄ îchieekbe iso.

²Sera oninin̄ owot, mè iman gwun̄ enerieen̄ ge inyi Ebereyam me ukan, me ike mgbọ Awaji ochieekbe ọmọ use.

³Ebereyam ogwegwen gwun̄ ya Sera omanbe inyi ọmọ, Ajiki.[34]

⁴Mgbọ Ajiki osobe usen jeeta, Ebereyam ofefieek ọmọ afi kubọk Awaji onyibe ida ibe erọ.

⁵Ebereyam ìre efit acha ge mgbọ emanbe Ajiki gwun̄ kan̄ inyi.

⁶Sera onenitumu ibe, “Awaji îrọ inyi emi ǹchak imọm. Ebi geelek mênọbe inu yi òrọrọ mêgọọk emi ichak imọm.”

⁷Îtumu si ibe, “Ìre ekene motumu inyi Ebereyam ibe ke gwun̄ mônwọ ebe me ejit kè Sera? Me atikọ, emi nra iman gwun̄ inyi Ebereyam me ikeke ukan kan̄.”

⁸Ajiki onenimin, ogwu uga oneniban ọmọ ebe. Usen ebanbe Ajiki ebe, Ebereyam ototo ikpele ijọk.

⁹Ire, Isimen, gwun̄ Ega ogwu Ijipiti omanbe inyi Ebereyam okekirọ Ajiki inu ochak. Sera omumun̄,

¹⁰mè itumu inyi Ebereyam ibe, “Lap ogwu enenwaan̄ usun̄ yilọ mè ogwu gwun̄ sibi me uwu yi. Mije, gwun̄ usun̄ yi ìkpogọọk Ajiki gwun̄ n̄a igbaan̄ ikaan̄ ìrot geege me uwu yi.”

¹¹Ikọ ya Sera otumube ofefieek Ebereyam me lek enenen, mije, ìkaweek ilalap ogwu gwun̄ Isimen isibi me uwu.

¹²Ire, Awaji onenitumu inyi Ebereyam ibe, “Kafieek ejit me lek gwun̄ kwun̄ enerieen̄ melek usun̄ kwun̄ enenwaan̄. Otutuuk inu cha Sera otumube inyi owu, gban̄ utọn̄ me lek, mè rọ. Mije, îre bọn owot iman kè Ajiki ke ebefuk kubọk echi kwun̄.

¹³Ire, emi mârọ si inyi gwun̄ ogwu usun̄ kwun̄ ya imin ikana ido. Mije, ọmọ ìre si gwun̄ kwun̄.”

¹⁴Me ofit iwele kan̄, me okpa otu ewelegwe, Ebereyam omọmọnọ inorie, mè itap mun̄ inwọnwọ me emen ogbokot ikpa anam, mè iben itoon̄ Ega me oguga, mè isa ọmọ melek Isimen ogwu gwun̄ iban me oniin̄. Ega osasa gwun̄ ya ikijijen̄e ikana me emen èwê ere ama Bieseba okupbe.

¹⁵Mgbọ mun̄ kiban̄ otabe, Ega obeben ogwu gwun̄ isi iyik me irak gwun̄ uti ge,

¹⁶mè ije ida ibọkọ me agba lek gwun̄ ya, inu òbet lek akọp ejit go, isi isiki ikweek, mije, ìbe ke ọmọ ìkpokọt isa chieen̄ kan̄ imun̄ mgbọ gwun̄ kan̄ obokwu. Ikwekweek me ere ya, mè ibene ito ikito.[35]

¹⁷Awaji onọnọ ida ito gwun̄ ya. Ogwu osat Awaji ge okukup me emen inyọn̄ igwen Ega, mè ido ibe, “Ìre keke ore ufialek kwun̄? Katet ukpook! Awaji înọ ida ito gwun̄ ya me ere îkupbe.

¹⁸Nan̄a keke si bene gwun̄ ya kaan̄ me ubọk kwun̄. Mije, emi mârọ inyi gwun̄ ya ikana ikpele ido.”

¹⁹Awaji onenichili Ega chieen̄. Ega omumun̄ udọn̄ mun̄ ge me ere ya, mè isi ichibi mun̄ ijot ogbokot ikpa anam ya, mè itọkọ inyi gwun̄ ya inwọ.

²⁰Awaji okekeke inyi gwun̄ ya. Gwun̄ ya onenimin isibi, mè iluk me emen èwê ya, mè ikana ogwu ota òkisook oraan̄.

²¹Mgbọ ema elukbe me emen èwê me agan̄ Paran ya, ogwu uga onenisi ido nwa me Ijipiti inyi gwun̄ ya.

²²Usen ge me emen mgbọ ya, Abimelek melek Fikolu, ogwu ibot akọn̄ kan̄, enenije isi lek kè Ebereyam. Abimelek otutumu inyi Ebereyam ibe, “Mmun̄ ibe ke Awaji îkeke inyi owu me otutuuk inu geelek owu okirọ.

²³Eya orọ, sa Awaji nyan̄a ibot nyi emi mgbọ keyi ibe ke owu òkpofiaan̄ emi mè bọn n̄a mè ebi owot iman n̄a. Nyan̄a ibot si ibe ke owu môkaan̄ ata ejit me lek n̄a melek inyọn̄ ijọn̄ yi ere owu ogọọkbe eji iluk, ike emi nkaan̄be ata ejit me lek kwun̄.”

²⁴Ebereyam ofọfọọk ibe, “Nchieek inyanyan̄a ibot inyi owu.”

²⁵Inenitumu inyi Abimelek ibe, “Kpọ, ebi kwun̄ mîtet eji udọn̄ mun̄ kiji ibọkọ.”

²⁶Abimelek ofọfọọk ibe, “Emi ǹkariọọn̄ ogwu òrọrọ ojelek inu òkup ikeya. Owu òkatutumu ikọ yi ìnyi emi, emi ǹkanọnọ si me otu ofifi ene. Adasi emi inọnọ ikọ yi ire eyi.”

²⁷Ebereyam onenikpulu arọọn̄ mè eriembuuk isa inyi Abimelek. Ema ene iba egbagbaan̄ inyan̄a ibot.

²⁸Ebereyam onenigobo bọn uman arọọn̄ jaaba isun̄ esese.

²⁹Mgbọ Abimelek omun̄be inu ya, idodo Ebereyam ibe, “Sa bọn uman arọọn̄ jaaba kechi owu ogobobe isun̄ esese chi ìkup inyi keke ni?”

³⁰Ebereyam ofọfọọk ọmọ ibe, “Soso bọkọ bọn uman arọọn̄ jaaba chi kubọk inu ata-ikọ ibe ke îre emi nrọkọ udọn̄ mun̄ yi.”

³¹Ikeya orọ ekigwen ama ya Bieseba,[36] mije ema ene iba ekupbe me ama ya inyan̄a ibot.

³²Mgbọ ema enyan̄abe ibot isan̄a me Bieseba, Abimelek mè Fikolu, ogwu ibot akọn̄ kan̄, eneninan̄a ije ifo ido ebi Filisia.

³³Ebereyam oneniwop uti tamaris ge me Bieseba, mè itọbọ ebum me ere ya inyi Okumugwem Awaji Mgbọ Geelek.

³⁴Ebereyam îluk ijọn̄ọ mgbọ me ido ebi Filisia ya.