Read obolo Ibeb 23 Bible Online

Ibeb 23 - obolo bible

Ibeb 23

¹Sera îluk ugwem iso efit acha mè akọp iba mè jaaba.

²Sera onenikwu me Kiriat Ariba, eyi òrere Eburọn, me ido Kenan. Ebereyam ofefieek ejit, mè ito ito enenen inyi Sera ogwu nwa.

³Ebereyam onenitele nkwukwu ogwu nwa, mè isi lek ebi Et, ebikaan̄ ijọn̄ ere îlukbe,

⁴mè itumu inyi ema ibe, “Emi ìre ogwu ichen ònunu inigọọk iluk me etete kinyi. Soso, ìnyam emi sọntiik ijọn̄, inyi ǹkensa m̀fuun̄ ebi n̄a.”

⁵Ebi Et cha efọfọọk ọmọ ibe,

⁶“Ogwu nte, gban̄! Owu ìre ikpele ene Awaji me etete kiji. Fuun̄ ebi kwun̄ me ere ifuun̄-ene kiji echi ònwọnwọn ichit. Kpunu ene geege òbojit ibe owu okafuun̄ ebi kwun̄ me ere ọmọ okifuun̄ ene.”

⁷Ebereyam onanan̄a ikeke, mè itọbọ ibot inyi ebi Et cha, ìrere ebikaan̄ inyọn̄ ijọn̄ ya,

⁸mè itumu inyi ema ibe, “Ire ineme enyi ibe emi ǹkemfuun̄ ebi n̄a me ijọn̄ kinyi, soso ìgọọk emi ìbeek Efurọn gwun̄ kè Sowari,

⁹ibe itumu ewe ǹkororok kan̄ òkup me òta ijọn̄ uko kan̄ me ama Makipela inyi emi ǹlep ǹkensa m̀fuun̄ ebi n̄a, ke mâkpe inu geelek Efurọn môtumube inyi emi me isi kinyi.”

¹⁰Efurọn ogwu Et, okukup me etete ebi Et kiban̄ cha ìkweek me ere ya, mè itumu inyi Ebereyam, me isi otutuuk ebi ìkup me otunchit ama ya mgbọ ya ibe,

¹¹“In̄-in̄! Ogwu nte, gban̄! Emi m̀kpanyanyam ijọn̄ ya inyi owu, ǹcheche ijọn̄ ya mè ǹkororok òkup me emen inyi owu, me isi otutuuk ebi ama kiji, ibe owu òbọkọ òsa òkofuun̄ ebi kwun̄.”

¹²Ebereyam okpọkpọk itọbọ ibot inyi ebikaan̄ ijọn̄ ya,

¹³mè itumu inyi Efurọn, me isi otutuuk ebi ene cha, ibe, “Môneme emi ire ogban̄ utọn̄ me ikọ nkitumu. Soso tele mè m̀kpe ewe ijọn̄ ya. Bọkọ ikpoko yi, inyi m̀fuun̄ nwa n̄a me ere ya.”

¹⁴Efurọn onenifọọk Ebereyam ibe,

¹⁵“Ogwu nte n̄a, gban̄, otu ewe ijọn̄ ya ìre efit alata okuket ini.[37] Ire, ikpoko ìkakup me lek inu geege me etete kwun̄ melek n̄a. Kpọ, ijọn̄ ire eya, ben nwa kwun̄ si fuun̄.”

¹⁶Ebereyam ochechieek, mè ifuk efit alata okuket ini inyi Efurọn, igọọk me otu ifuk ikpoko mgbọ ya, ike Efurọn otumube me isi otutuuk ebi Et ìkweek me ere ya.

¹⁷Sa me ikeya ke ijọn̄ kè Efurọn eyi òkup me ama Makipela me agba lek ama Mamire, melek ǹkororok òkup me inyọn̄ ijọn̄ ya, mè otutuuk uti geelek òkup me inyọn̄ ijọn̄ ya ikat ikana me okike ijọn̄ ya,

¹⁸okana echi kè Ebereyam, me isi otutuuk ebi Et cha ìnunu me otunchit ama ya mgbọ ya.

¹⁹Mgbọ Ebereyam okpebe ewe ijọn̄ ya isan̄a, ibeben Sera ogwu nwa isi ifuun̄ me emen ǹkororok ya òkup me Makipela, me agba lek ama Mamire, òrere Eburọn, me ido Kenan.

²⁰Sa me ikeya ke ijọn̄ ya, mè ǹkororok òkup me inyọn̄ ijọn̄ ya, osa inan̄a me ubọk ebi Et, ikana inin̄ ubọk kè Ebereyam. Ebereyam osasa ijọn̄ ya irọ ijọn̄-ufuun̄ kan̄.